بۇل ەلدىڭ بايىرعى اتاۋلارىن، ۇلى تۇلعالارىمىزدىڭ ەسىمىن ۇرپاق ساناسىندا جاڭعىرتادى.
پرەزيدەنتتىڭ ايتۋىنشا، جاڭا وبلىستاردىڭ اتالۋىندا ەرەكشە ءمان بار، دەپ حابارلايدى Almaty-akshamy.kz
«سەمەي ايماعىندا اباي وبلىسىن قۇرۋدى ۇسىنامىن. سەمەي قالاسى جاڭا وبلىستىڭ ورتالىعى بولادى. وسى ماسەلەنى ايماق تۇرعىندارى كوپتەن بەرى ايتىپ جۇرگەنىن بىلەمىن. ءقازىر ول جاقتا شەشىمىن تاپپاعان تۇيتكىلدەر از ەمەس. مىسالى، ايماقتىڭ ىشكى ينفراقۇرىلىمى ابدەن توزعان».
«تاعى ءبىر ماسەلە. بۇرىنعى جەزقازعان وبلىسىنىڭ اۋماعىندا ۇلىتاۋ وبلىسىن قۇرۋ قاجەت. جەزقازعان قالاسى قايتادان وبلىس ورتالىعى بولادى. بۇل ايماقتا دەربەس وبلىس قۇرۋ – ەكونوميكالىق قانا ەمەس، رۋحاني جاعىنان دا ماڭىزدى شەشىم».
«ءۇشىنشى ماسەلە. الماتى اگلومەراسياسىنا قاتىستى تۇيتكىلدەر كوپ. وسى جانە باسقا دا جايتتاردى ەسكەرە وتىرىپ، الماتى وبلىسىن ەكىگە ءبولۋدى ۇسىنامىن. بۇل وڭىردە جەتىسۋ جانە الماتى وبلىستارى قۇرىلادى. الماتى وبلىسىنىڭ ورتالىعى قاپشاعايدا بولۋى كەرەك. ال، جەتىسۋ وبلىسىنىڭ ورتالىعى تالدىقورعاندا ورنالاسادى».
«جاڭادان قۇرىلاتىن وبلىستاردىڭ اباي، ۇلىتاۋ، جەتىسۋ دەپ اتالۋىندا ەرەكشە ءمان بار. ءبىز ۇلانعايىر جەرىمىزدىڭ بايىرعى اتاۋلارىن، ۇلى تۇلعالارىمىزدىڭ ەسىمىن ۇرپاق ساناسىندا جاڭعىرتا بەرەمىز»، - دەدى پرەزيدەنت.