بۇگىندە ەلىمىزدە جەتىم بالالار مەن اتا-اناسىنىڭ قامقورلىعىنسىز قالعان بالالارعا جەكە قولداۋ مەن كومەك كورسەتەتىن تالىمگەرلىك ينستيتۋتىن ەنگىزۋ جونىندەگى جوبا تابىستى ىسكە اسىرىلۋدا. ەلىمىزدىڭ 17 قالاسىندا 300-دەن استام ادام تالىمگەر اتاندى.
تالىمگەرلىك جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ ءال-اۋقاتىن قامتاماسىز ەتۋدىڭ ماڭىزدى قۇرالى بولىپ تابىلادى. ول بالانى قوعامعا بەيىمدەۋگە جانە ءوز بەتىنشە ەرەسەك ءومىر سۇرۋگە دايىنداۋعا باعىتتالعان، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
تالىمگەرلىككە كانديداتتاردى ىرىكتەۋ پروسەسىن قورعانشى جانە قامقورشى ورگاندار جۇزەگە اسىرادى. ءاربىر كانديدات اڭگىمەلەسۋ ارقىلى وتەدى، سونداي-اق تۇرعىن ءۇي-تۇرمىستىق جاعدايلارى دا ەسكەرىلەدى. ىرىكتەۋدىڭ بارلىق كەزەڭدەرىنەن ءوتىپ، ءتيىستى قورىتىندى العاننان كەيىن عانا كانديدات تالىمگەر بولا الادى.
كانديداتتارعا قويىلاتىن تالاپتار ق ر ازاماتتىعىن، كامەلەتكە تولۋىن، سوتتىلىعىنىڭ جوقتىعىن، ارەكەتكە قابىلەتتىلىگىن، تۇرعىلىقتى جەرىنىڭ بولۋىن جانە ت.ب. قامتيدى. تالىمگەردىڭ بالاعا قوسىمشا ءبىلىم بەرۋ مەن مەديسينالىق قىزمەتتەردى قوسا العاندا، ءتۇرلى سالالاردا قولداۋ كورسەتۋگە قۇقىعى بار.
ايتا كەتۋ كەرەك، بيىل «بالا قۇقىقتارى تۋرالى» زاڭعا جەتىم بالالارعا تالىمگەرلىك جاساۋ ينستيتۋتىن ەنگىزۋگە باعىتتالعان وزگەرىستەر ەنگىزىلدى. بۇل قادام اتا-اناسىنىڭ قامقورلىعىنسىز قالعان بالالاردىڭ بولاشاعىنا وڭ ىقپال ەتىپ قانا قويماي، الەۋمەتتىك سالادا ىلگەرىلەۋدىڭ جارقىن مىسالى بولا الادى.