شۆەيساريامەن ىنتىماقتاستىق ارتۋدا
قازاقستان مەن شۆەيساريا اراسىنداعى ىنتىماقتاستىق مەموراندۋمىنا قول قويىلدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ارىپتەستىك نىعايۋدا. قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ دەلەگاسياسى جەنيەۆالىق ساياسات پەن قاۋىپسىزدىك ورتالىعى جانە جەنيەۆاداعى بۇۇ ءبولىمى كىتاپحاناسى مەن مۇراعاتى باسشىلارىمەن كەزدەستى. اتالمىش ءىس-شارا بارىسىندا جاھاندىق جانە ايماقتىق قاۋىپسىزدىك ماسەلەلەرى جونىندە بىرلەسكەن جوبالاردى جۇزەگە اسىرۋ بويىنشا ىنتىماقتاستىق مەموراندۋمىنا، سونداي-اق ارناۋلى حاتقا قول قويىلدى.
بۇل قۇجات مۇراعات، تاريح سالالارىنداعى كوپجاقتى، حالىقارالىق قارىم-قاتىناستار مەن قۇندىلىقتاردى زەرتتەۋدىڭ ىنتىماقتاستىعىن، بۇۇ قىزمەتى مەن قازاقستاننىڭ تاريحي مۇراسىن زەرتتەۋدەگى سەرىكتەستىكتى كوزدەيدى.
ايتا كەتەيىك، شۆەيساريادا وتكەن ارناۋلى ءىس-شارا سەمەي يادرولىق پوليگونىنىڭ جابىلۋىنا 30 جىل تولۋىنا وراي ۇيىمداستىرىلدى.
«بۇۇ كىتاپحاناسى – ءوز باستاۋىن ۇلتتار ليگاسىنان العان بىرەگەي مەكەمە. مۇندا بۇۇ-نىڭ يادرولىق قارۋعا قارسى ارەكەتىن قامتىپ كورسەتەتىن مۇراعاتتىق قۇجاتتار جينالعان. بۇل – قازاقستان جانە ەلباسى كىتاپحاناسىنىڭ دا ماڭىزدى ءبىر باعىتى، ويتكەنى تۇڭعىش پرەزيدەنتىمىزدىڭ تاريحي مۇراسىنىڭ ءبىر بولىگى سانالادى. بۇۇ جانە تۇڭعىش پرەزيدەنتىمىزدىڭ كىتاپحانالارى اراسىندا بىرلەسكەن جوبالاردى جۇزەگە اسىرۋ جانە اقپارات، كىتاپ، باسىلىم، مۇراعاتتىق قۇجات الماسۋ بويىنشا ورتاق تۇستارى كوپ»، - دەدى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ ديرەكتورى باقىتجان تەمىربولات.
جەنيەۆاداعى بۇۇ ءبولىمى كىتاپحاناسى مەن مۇراعاتىنىڭ ديرەكتورى فرانچەسكو پيزانو قازاقستان بۇۇ-نىڭ بەلدى مۇشەسى ەكەنىن ايتتى.
«قازاقستان بۇۇ-نىڭ بەلدى مۇشەسى ەكەنىن بىلەمىز. يادرولىق قارۋسىزدانۋ، حالىقارالىق ىنتىماقتاستىق پەن كوپجاقتى قارىم-قاتىناستارعا زور كوڭىل بولەتىن ەل. سوندىقتان ىنتىماقتاستىق مەموراندۋمىنا قول قويعانىمىزدى جوعارى باعالاپ وتىرمىز. قازاقستان مەن جەنيەۆاداعى بۇۇ كەڭسەسى اراسىندا تاعى ءبىر مىقتى بايلانىس بار. قازاقستان پرەزيدەنتى قاسىم-جومارت توقايەۆ وسى ءبولىمنىڭ باس ديرەكتورى بولعان. ونىڭ قول استىندا جۇمىس ىستەدىم، جاقسى تانيمىن. مۇندا اتقارعان ەڭبەگىنە وتە ريزامىن»، - دەدى فرانچەسكو پيزانو.