ەلىمىز بەن ءباا اراسىنداعى رەيستەر كوبەيدى

الماتى – ءابۋ-دابي باعىتى بويىنشا رەيستەر سانى اپتاسىنا 5-تەن 7 رەتكە دەيىن ارتادى.

بىرىككەن اراب امىرلىكتەرى باعىتىنداعى اۋە رەيستەرىنىڭ سانى ارتىپ جاتىر، دەپ حابارلايدى Almaty-akshamy.kz

ازاماتتىق اۆياسيا كوميتەتىنىڭ مالىمەتىنشە، بيىل 1 شىلدەدەن باستاپ «Wizz Air Abu Dhabi» اۋە كومپانياسى قازاقستان مەن ءباا استانالارى استانا جانە ءابۋ-دابي قالالارى اراسىندا اپتاسىنا 3-تەن 5 رەتكە دەيىن (سەيسەنبى، سارسەنبى، جۇما، سەنبى، جەكسەنبى) تۇراقتى جولاۋشىلار رەيستەرىنىڭ سانىن ۇلعايتۋدى جوسپارلاپ وتىر.

سونىمەن قاتار، 4 تامىزدان باستاپ «Wizz Air Abu Dhabi» اۋە كومپانياسى الماتى – ءابۋ-دابي باعىتى بويىنشا تۇراقتى جولاۋشىلار رەيستەرىنىڭ سانىن اپتاسىنا 5-تەن 7 رەتكە دەيىن (كۇن سايىن) ارتتىرۋدى جوسپارلاپ وتىر. رەيستەر Airbus 320 جانە Airbus 321 ءتيپتى اۋە كەمەلەرىندە ورىندالادى.

قازاقستان مەن ءباا اراسىنداعى رەيستەر سانىنىڭ ۇلعايۋى ەلدەر اراسىنداعى تۋريستىك، مادەني، ينۆەستيسيالىق جانە ىسكەرلىك ىنتىماقتاستىقتى ودان ءارى دامىتۋعا، سونداي-اق حالىقارالىق اۋە تاسىمالدار نارىعىنداعى باسەكەلەستىكتى ارتتىرۋعا جانە اۋە بيلەتتەرى باعاسىنىڭ تومەندەۋىنە ىقپال ەتەتىن بولادى.