ول فينالدا چەحيالىق كاتەرجينا سينياكوۆامەن باس جۇلدە ءۇشىن تالاستى
قازاقستاننىڭ ءبىرىنشى، الەمنىڭ 25-راكەتكاسى ەلەنا رىباكينا پورتوروج (سلوۆەنيا) WTA 250 ءتۋرنيرىنىڭ فينالىندا جەڭىلىپ قالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
جارىستىڭ ءۇشىنشى راكەتكاسى بولىپ تىركەلگەن قازاقستاندىق تەننيسشى فينالدا دۇنيەجۇزىلىك رەيتينگىدە 82-ورىندا تۇرعان چەحيالىق كاتەرجينا سينياكوۆامەن باس جۇلدە ءۇشىن تالاستى.
ءبىرىنشى پارتيادا رىباكينا قوس برەيك جاساپ، 5:0 ەسەبىمەن العا كەتكەنىمەن، سينياكوۆانىڭ تارازى باسىن تەڭەستىرۋىنە مۇمكىندىك بەرىپ قويدى – 5:5. بىرنەشە سەت-پوينتتى دا پايدالانا المادى. دەگەنمەن تاي-برەيكتە قارسىلاسىن تىعىرىققا تىرەي ءبىلدى – 7:6 (7:4).
ەكىنشى سەتتە ەسەپ 3:3 بولعان مەزەتتە قازاقستاندىق سپورتشى برەيك جاساعانىمەن، چەحيالىق تەننيسشى سول بويدا ەسە قايىردى – 4:4. بۇل جولى تاي-برەيكتە سينياكوۆا ءساتتى وينادى – 7:6 (7:5).
ءۇشىنشى، شەشۋشى سەتتە ك.سينياكوۆا برەيكپەن العا كەتتى – 4:2. سودان سوڭ ە.رىباكينا ەسەپتى تەڭەستىرگەنىمەن، چەحيالىق ويىنشى قايتا برەيك جاسادى. اقىرى ول ماچقا دوپ بەرگەندە، ءوز مۇمكىندىگىن ءمۇلت جىبەرگەن جوق – 6:4.
ءۇش ساعاتقا سوزىلعان تارتىستى ماچتا ەلەنا 8 ەيس جاساپ، 7 برەيك-پوينتتىڭ تورتەۋىن پايدالاندى. قارسىلاسى 1 ەيس، 5 برەيكپەن (9 برەيك-پوينت) كوزگە ءتۇستى.
بۇعان دەيىن ە.رىباكينا سەگىز رەت WTA دودالارىنىڭ فينالىنا شىعىپ، سونىڭ ەكەۋىندە عانا ۇزدىك شىققان ەدى.
سونىمەن قاتار ە.رىباكينانىڭ بيىل ۋيمبلدون ءتۋرنيرىنىڭ چەمپيونى اتانعانى بەلگىلى.
ەسكە سالا كەتەيىك، بۇدان بۇرىن اننا دانيلينانىڭ چەحياداعى جارىستىڭ جەڭىمپازى اتانعانىن، ەلەنا رىباكينانىڭ سلوۆەنياداعى ءتۋرنيردىڭ فينالىنا شىققانىن جازعان بولاتىنبىز.
سونداي-اق تەننيسشى جىبەك قۇلامبايەۆا بيىلعى بەسىنشى تيتۋلىنا قول جەتكىزدى.