ەلەنا رىباكينا رولان گارروس ءتۋرنيرىنىڭ ءۇشىنشى اينالىمىنا شىقتى

ءبىرىنشى پارتيا سوڭىنا تامان ە.رىباكينا برەيك جاساپ، تارازى باسىن وزىنە اۋدارا ءبىلدى

قازاقستاننىڭ ءبىرىنشى، الەمنىڭ 16-راكەتكاسى ەلەنا رىباكينا رولان گارروس ءتۋرنيرىنىڭ ءۇشىنشى اينالىمىنا شىقتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

فرانسيا اشىق چەمپيوناتىنىڭ 16-راكەتكاسى بولىپ تىركەلگەن قازاقستاندىق تەننيسشى ەكىنشى اينالىمدا دۇنيەجۇزىلىك رەيتينگتە 135-ورىندا تۇرعان 20 جاستاعى امەريكالىق كەتي ۆولىنەسپەن شەبەرلىك بايقاستى.

بۇل ولاردىڭ ءوزارا ءبىرىنشى كەزدەسۋى ەدى.
ءبىرىنشى پارتيا سوڭىنا تامان ە.رىباكينا برەيك جاساپ، تارازى باسىن وزىنە اۋدارا ءبىلدى – 6:4.
ەكىنشى سەتتە قارقىنىن ءتىپتى ۇدەتىپ، قارسىلاسىنا بىردە-بىر گەيم بەرگەن جوق – 6:0.
ءبىر ساعاتتان استام ۋاقىتقا سوزىلعان باسەكە بارىسىندا قازاقستاندىق سپورتشى 2 ەيسپەن بىرگە 11 برەيك-پوينتتىڭ تورتەۋىن پايدالاندى.

وتكەن جىلى رولان گارروس جارىسىنىڭ شيرەك فينالىنا دەيىن جەتكەن ە.رىباكينا ءۇشىنشى اينالىمدا الەمنىڭ 22-راكەتكاسى، امەريكالىق مەديسون كيز نەمەسە رەيتينگتە 79-ساتىداعى فرانسيالىق كارولين گارسيانىڭ بىرەۋىمەن كەزدەسەدى.