ەلەنا 9 ەيس جاساپ، 8 برەيك-پوينتتىڭ بەسەۋىن ءمۇلت جىبەرگەن جوق
قازاقستاننىڭ ءبىرىنشى، الەمنىڭ 4-راكەتكاسى ەلەنا رىباكينا رولان گارروس ءتۋرنيرىنىڭ ەكىنشى اينالىمىنا شىقتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستاندىق تەننيسشى العاشقى اينالىمدا دۇنيەجۇزىلىك رەيتينگتە 146-ورىندا تۇرعان چەحيالىق 16 جاسار برەندا فرۋحۆيرتوۆامەن كەزدەستى.
ءبىرىنشى پارتيادا ەسەپ 3:3 بولعان مەزەتتە چەحيالىق سپورتشى برەيكپەن العا شىققانىمەن، ەلەنا كوپكە ۇزاتپادى. سودان كەيىن تاعى ءبىر برەيكپەن سەتتى ءتامامدادى – 6:4.
برەندا فرۋحۆيرتوۆا ەكىنشى پارتيادا دا برەيك جاساعانىمەن ە.رىباكينا تارازى باسىن قايتا تەڭەستىرىپ، ءوز گەيمىن دە الدى – 3:2. اقىرى ماچتى كەزەكتى برەيكپەن تۇيىندەدى – 6:2
ءبىر ساعات 17 مينۋتقا سوزىلعان باسەكە بارىسىندا ەلەنا 9 ەيس جاساپ، 8 برەيك-پوينتتىڭ بەسەۋىن ءمۇلت جىبەرگەن جوق. قارسىلاسى 2 برەيكپەن (7 برەيك-پوينت) شەكتەلدى.
ەلەنا رىباكينا ەكىنشى اينالىمدا چەحيانىڭ تاعى ءبىر جاس جۇلدىزى، الەمنىڭ 50-راكەتكاسى، 18 جاستاعى ليندا نوسكوۆامەن شەبەرلىك بايقاسادى.
ول رەيتينگتە 68-ساتىداعى چەرنوگوريالىق دانكا كوۆينيچتى جولدان تايدىردى. ليندا ءبىرىنشى پارتيادا 6:3 ەسەبىمەن باسىم ءتۇستى.
ەكىنشى سەتتە ەسەپ 2:1 بولعاندا، قارسىلاسى جاراقاتىنا بايلانىستى ويىندى جالعاستىرا المادى.
ەسكە سالا كەتەيىك، بۇدان بۇرىن يۋليا پۋتينسيەۆانىڭ رولان گارروس ءتۋرنيرىنىڭ ەكىنشى اينالىمىنا شىققانىن جازعان بولاتىنبىز. ال الەكساندر بۋبليك رولان گارروس تۋرنيرىندە جەڭىلىپ قالدى.
سونداي-اق رولان گارروستىڭ العاشقى اينالىمىندا جەڭىسكە جەتكەن يۋليا پۋتينسيەۆادان سۇحبات العان ەدىك.