قازاقستاننىڭ ءبىرىنشى، الەمنىڭ 23-راكەتكاسى ەلەنا رىباكينا العاش رەت ۋيمبلدون ءتۋرنيرىنىڭ چەمپيونى اتاندى، دەپ حابارلايدى Almaty-akshamy.kz Inform.kz-كە سىلتەمە جاساپ.
قازاقستاندىق تەننيسشى ۇلىبريتانيا اشىق چەمپيوناتىنىڭ سوڭعى باسەكەسىندە الەمنىڭ 2-راكەتكاسى، تۋنيستىك ونس جابەرمەن باس جۇلدەنى ساراپقا سالدى.
بۇل ەكەۋىنىڭ دە «ۇلكەن دۋلىعا» جارىسىنداعى العاشقى فينالى ەدى. وسىعان دەيىن قارسىلاستار ءۇش رەت كەزدەسىپ، سونىڭ ەكەۋىندە و.جابەر جەڭىسكە جەتكەن ەدى.
ءبىرىنشى پارتيادا برەيك جاساعان تۋنيستىك سپورتشى العا كەتتى. سەتتى ول تاعى ءبىر برەيكپەن ءتامامدادى – 6:3. ەسەسىنە ەكىنشى سەتتى ەلەنا برەيكپەن باستادى – 2:0. تاعى ءبىر برەيك – 4:1. سودان كەيىن ءوز گەيمىن الا ءبىلدى – 6:2.
ە.رىباكينا ءۇشىنشى، شەشۋشى پارتيانى دا برەيكپەن باستادى – 2:0. التىنشى گەيمدە ەلەنا دوپ بەرگەندە، 0:40-تان «قۇتىلا» الدى – 4:2.
تاعى ءبىر برەيك – 5:2. سودان كەيىن ماچقا دوپ بەرگەندە، مۇمكىندىگىن ءمۇلت جىبەرگەن جوق – 6:2.
وسىلايشا، ەلەنا رىباكينا قازاقستاندىق تەننيسشىلەر اراسىندا تۇڭعىش رەت جەكەلەي سىندا «ۇلكەن دۋلىعا» جارىسىنىڭ جەڭىمپازى اتاندى.
ەسكە سالا كەتەيىك، بۇدان بۇرىن بۋكمەكەرلەر ۋيمبلدون فينالىندا ەلەنا رىباكينانىڭ قارسىلاسىن فاۆوريت دەپ تانىپ وتىرعانىن جازعان بولاتىنبىز.
سونداي-اق قازاقستاندىق تەننيسشىلەردىڭ بيللي دجين كينگ كۋبوگىنداعى قارسىلاستارى انىقتالدى.