ەلەكتروندىق قۇجاتپەن بيلەت الۋعا بولا ما؟

قازاقستاندىقتار سيفرلىق جەكە كۋالىكتى ەندى اۆتوكولىكپەن تاسىمالداۋ سالاسىندا قاعاز تۇرىندەگى جەكە كۋالىكپەن تەڭ پايدالانا الادى.

بۇل تۋرالى حابارلاعان ق ر يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە، جولاۋشىلار اۋدانارالىق، قالاارالىق، وبلىسىشىلىك باعىتتاردا اۆتوبۋستارعا وتىرعىزۋ كەزىندە جەكە كۋالىگىن ءوز قالاۋى بويىنشا - ءتۇپنۇسقادا نەمەسە ەلەكتروندىق قۇجات تۇرىندە (ۇيالى تەلەفون ارقىلى) ۇسىنا الادى، دەپ حابارلايدى Almaty-akshamy.kz

سونداي-اق، اۆتوۆوكزالداردا، اۆتوستانسيالاردا، جولاۋشىلارعا قىزمەت كورسەتۋ تىرەكتەرىندە سيفرلىق جەكە كۋالىكپەن بيلەتتەر ساتىپ الۋعا بولادى. بۇدان بولەك، حالىقارالىق، قالاارالىق، وبلىسارالىق، اۋدانارالىق (وبلىسىشىلىك، قالاارالىق) باعىتتاردا جول ءجۇرۋ كەزىندە جۇك الۋ مۇمكىندىگى كوزدەلگەن.

«سونىمەن قاتار تاكسي جۇرگىزۋشىلەرى رەيس الدىنداعى جانە رەيستەن كەيىنگى مەديسينالىق كۋالاندىرۋدان ءوتۋ كەزىندە جەكە كۋالىكتى قاعاز تاسىعىشتا دا، ەلەكتروندىق نىساندا دا پايدالانا الادى. جوعارىدا اتالعان نورمالار ق ر يندۋستريا جانە ينفراقۇرىلىمدىق دامۋ ءمينيسترىنىڭ بۇيرىعىمەن (2021 جىلعى 4 قازانداعى№ 524) ق ر ۇكىمەتىنىڭ تاپسىرماسى بويىنشا سيفرلىق تەحنولوگيالاردى دامىتۋ جانە ازاماتتاردىڭ جەكە كۋالىكتەرىنىڭ ءتۇپنۇسقالارىن وزىمەن بىرگە الىپ ءجۇرۋ قاجەتتىلىگىنسىز ءوز قۇقىقتارىن ىسكە اسىرۋ مۇمكىندىگىن كەڭەيتۋ ءۇشىن قابىلداندى»، - دەلىنگەن مينيسترلىكتىڭ مالىمەتىندە.