مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا استانادا جاساندى ينتەللەكت ۇلتتىق ورتالىعىن ىسكە قوسۋدى تاپسىردى.
«قازاقستان سيفرلاندىرۋ سالاسىندا قول جەتكىزگەن جەتىستىكتەرىن ەسەلەي تۇسۋگە ءتيىس. «ەلەكتروندى ۇكىمەت» پلاتفورماسىنا جاساندى ينتەللەكت تەحنولوگياسىن بارىنشا ەنگىزۋ قاجەت. قازاقستان جاساندى ينتەللەكتىنى كەڭىنەن قولداناتىن جانە سيفرلىق تەحنولوگيالاردى دامىتىپ جاتقان ەلگە اينالۋعا ءتيىس. بۇل – ۇكىمەتتىڭ باستى مىندەتىنىڭ ءبىرى. پارلامەنت دەپۋتاتتارىن وسى جۇمىسقا اتسالىسۋعا شاقىرامىن.
كەلەسى جىلى استانادا جاساندى ينتەللەكت ۇلتتىق ورتالىعىن ىسكە قوسۋ كەرەك. بۇل ورتالىق وقۋشىلار، ستۋدەنتتەر، عالىمدار جانە كاسىپكەرلەر ءۇشىن ءاردايىم اشىق بولادى»، - دەدى پرەزيدەنت.
سونداي-اق، قاسىم-جومارت توقايەۆ سيفرلىق اكتيۆتەر مەن ماينينگتى زاڭمەن رەتتەپ، كريپتوبيرجالاردى ودان ءارى دامىتۋ كەرەكتىگىن ايتتى.
«ەلىمىزدە ەكونوميكاعا قاجەتتى ەلەكتر قۋاتىن ءوز كەرەگىنە شامادان تىس پايدالاناتىن، سويتە تۇرا سالىقتى از تولەيتىن كاسىپكەرلەر بار. مىنە، وسىندايلاردى جونگە سالۋ كەرەك.
2025 جىلى كاسپيي تەڭىزى ارقىلى تالشىقتى-وپتيكالىق بايلانىس جەلىسىن تارتۋ جوباسى اياقتالماق. ەلىمىز ءۇشىن بۇل جوبانىڭ ماڭىزى زور. سول ارقىلى مالىمەتتەردىڭ حالىقارالىق ارناسىمەن جانە ترانسشەكارالىق اعىنىمەن بايلانىستى سيفرلىق ينفراقۇرىلىم قۇرا الامىز. جالپى، تەلەكوممۋنيكاسيا جەلىلەرى مەن داتا-ورتالىقتارىن بارىنشا جەتىلدىرۋگە، كيبەر-قاۋىپسىزدىكتىڭ الەمدىك ستاندارتتارىن ەنگىزۋگە جانە ماماندارىمىزدىڭ بىلىكتىلىگىن ارتتىرۋعا قاتىستى جۇمىستى جالعاستىرۋ كەرەك»، - دەدى مەملەكەت باسشىسى.