جارمەڭكەگە قاتىسۋعا ءارتۇرلى سالالاردان 25-تەن استام جۇمىس بەرۋشى ءوتىنىم بەرگەن.
2023 جىلعى 20 ماۋسىمدا ەلەكتروندىق ەڭبەك بيرجاسى بازاسىندا Tanda.enbek.kz بولىمىندە «ەڭبەك رەسۋرستارىن دامىتۋ ورتالىعى» اق قولداۋىمەن استانا قالاسىنىڭ حالىقتى جۇمىسپەن قامتۋ ورتالىعى ۇيىمداستىرعان جاستارعا ارنالعان بوس جۇمىس ورىندارىنىڭ ونلاين-جارمەڭكەسى وتەدى، دەپ حابارلايدى Almaty-akshamy.kz
جارمەڭكەگە قاتىسۋعا ءارتۇرلى سالالاردان 25-تەن استام جۇمىس بەرۋشى ءوتىنىم بەرگەن. ولاردىڭ اراسىندا «قازپوشتا» اق، «استانا-ەنەرگيا» اق، «Center Beton Company» ج ش س، «لوكوموتيۆ قۇراستىرۋ زاۋىتى» اق، «ۇلتتىق اقپاراتتىق تەحنولوگيالار» اق، «First Heartland Jusan Bank» اق، استانا قالاسىنىڭ پوليسيا دەپارتامەنتى جانە تاعى باسقالار بار.
Tanda.enbek.kz-تە جۇمىس بەرۋشىلەر ءوز كاسىپورىندارى تۋرالى قىسقاشا اقپاراتتى، سونداي-اق بوس ورىندار تۋرالى مالىمەتتى ورنالاستىرادى.
20 ماۋسىمدا، ياعني ونلاين-جارمەڭكە وتەتىن كۇنى جۇمىس ىزدەۋشىلەر قولجەتىمدى بوس جۇمىس ورىندارىن كورەتىن بولادى، تۇيىندەمەلەرىن الەۋەتتى جۇمىس بەرۋشىلەرگە جىبەرىپ، كومپانيالاردىڭ HR-مەنەدجەرلەرىمەن سويلەسە الادى، سونداي-اق ولارعا وزدەرىن قىزىقتىرعان سۇراقتارىن قويۋمەن قاتار اڭگىمەلەسۋگە شاقىرلادى.
جۇمىس بەرۋشىلەر ءوز كەزەگىندە تالابىنا ساي كەلەتىن كانديداتتاردىڭ جەكە بازاسىن قالىپتاستىرادى.
«ونلاين-جارمەڭكەگە قاتىسۋ ءۇشىن ۇمىتكەرلەر جارمەڭكە وتەتىن www.tanda.enbek.kz سايتىنا كىرىپ، تىركەۋدەن ءوتۋى جانە جەكە كابينەتتە وزەكتى تۇيىندەمەسىن دايىنداۋى كەرەك. الداعى ۋاقىتتا Tanda.enbek.kz-تە ەلىمىزدىڭ بارلىق وڭىرلەرىندە تۇراقتى نەگىزدە ونلاين بوس ورىندار جارمەڭكەسى وتەدى. جارمەڭكەگە تىركەلۋ جۇمىس ىزدەۋشىلەر مەن جۇمىس بەرۋشىلەر ءۇشىن اشىق. بارلىق نيەت بىلدىرۋشىلەردى بوس جۇمىس ورىندارىنىڭ ونلاين-جارمەڭكەسىنە بەلسەندى قاتىسۋعا شاقىرامىز!» دەلىنگەن مينيسترلىك تاراتقان اقپاراتتا.