مەملەكەتتىك كىرىستەر دەپارتامەنتىنىڭ مالىمەتىنشە، "قازاقستان رەسپۋبليكاسىنداعى كەدەندىك رەتتەۋ تۋرالى" كودەكستىڭ 343–بابى 1–تارماعىنىڭ 7) تارماقشاسىنا سايكەس، ەگەر ەۋرازيالىق ەكونوميكالىق وداقتىڭ كەدەندىك اۋماعىنا ءبىر ۋاقىتتا اكەلۋ نەمەسە ەاەو–تىڭ كەدەندىك اۋماعىنان ءبىر ۋاقىتتا اكەتۋ كەزىندە مۇنداي قولما–قول اقشا قاراجاتىنىڭ جانە جول چەكتەرىنىڭ جالپى سوماسى كەدەن ورگانىنا جولاۋشىلارعا ارنالعان كەدەندىك دەكلاراسيانى ۇسىنعان كۇنگە قولدانىستا بولاتىن ۆاليۋتا باعامى بويىنشا ون مىڭ اقش دوللارىنا بالامالى سومادان اسىپ كەتسە، قولما–قول اقشا قاراجاتى جانە جول چەكتەرى كەدەندىك دەكلاراسيالاۋعا جاتادى.
"الايدا، بۇگىنگى تاڭدا ەلدىڭ ۇلتتىق مۇددەلەرىن قورعاۋ جانە قارجىلىق تۇراقتىلىقتى قامتاماسىز ەتۋ ماقساتىندا ق ر پرەزيدەنتىنىڭ 2022 جىلعى 14 ناۋرىزداعى № 830 جارلىعى قولدانىلادى، وندا قازاقستان رەسپۋبليكاسىنىڭ ۇلتتىق بانكى اكەتۋ كۇنىنە بەلگىلەگەن باعام بويىنشا ەسەپتەلگەن جانە 10 000 (ون مىڭ) اقش دوللارى بالاماسىنان اساتىن سوماداعى قولما–قول شەتەل ۆاليۋتاسىن جانە (نەمەسە) شەتەل ۆاليۋتاسىنداعى اقشا قۇرالدارىن اكەتۋگە تىيىم سالىنادى."، – دەپ حابارلادى مەملەكەتتىك كىرىستەر دەپارتامەنتى.
سونىمەن قاتار، "جەكە پايدالانۋعا ارنالعان تاۋارلاردى كەدەندىك دەكلاراسيالاۋ تۋرالى" ەۋرازيالىق ەكونوميكالىق كوميسسيا القاسىنىڭ 2019 جىلعى 23 شىلدەدەگى № 124 شەشىمىنە سايكەس 16 جاسقا تولماعان جەكە تۇلعالاردىڭ جەكە پايدالانۋعا ارنالعان تاۋارلارى تۋرالى مالىمەتتەر، اتالعان تۇلعالارمەن بىرگە جۇرەتىن تۇلعانىڭ جەكە پايدالانۋعا ارنالعان تاۋارلارى تۋرالى مالىمەتتەرمەن بىرگە ءبىر جولاۋشى كەدەندىك دەكلاراسيادا كورسەتىلەدى.
وسىلايشا، وتباسىنىڭ ءاربىر مۇشەسىنە 10 000 (ون مىڭ) اقش دوللارى بالاماسىنان اسپايتىن قولما–قول شەتەل ۆاليۋتاسىن اكەتۋگە رۇقسات ەتىلەدى.
شىلدەنىڭ 8ء-ى كۇنى استانا اۋەجايىندا كەدەندىك باقىلاۋدان وتكەن كەزدە قولىنداعى اقشاسىن دەكلاراسيادا كورسەتپەگەن ازاماتتىڭ ۇستالعانى حابارلانعان بولاتىن. ونىڭ باگاجىن تەكسەرۋ كەزىندە رەنتگەندىك تەلەديدار جۇيەسى قولدانىلعان 200 000 ەۋرو (120 ميلليون تەڭگە) تابىلدى.