ساياسي ناۋقاندا ادەتتەگىدەي ستۋدەنتتەر بەلسەندىلىك تانىتپاق.
استانا مەن لوندون اراسىنداعى ۋاقىت ايىرماشىلىعى - 6 ساعات. سوندىقتان بۇل ەلدەگى سايلاۋ قازاقستانعا قاراعاندا كەشىرەك باستالىپ، كەشىرەك اياقتالادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءقازىر ۋچاسكەدە سوڭعى دايىندىق جۇمىستارى جۇرگىزىلىپ، داۋىس بەرۋشىلەر تىركەلۋدە. بۇعان دەيىنگى سايلاۋلاردا جىل سايىن 500-گە جۋىق قازاقستاندىقتىڭ تاڭداۋ جاساعانى بەلگىلى. بيىل دا وتانداستارىمىزدىڭ بەلسەندىلىگى جوعارى بولادى دەگەن سەنىم بار.
«بىرىككەن كورولدىك قۇرامىنا انگليا، ۋەلس، شوتلانديا جانە سولتۇستىك يرلانديا مەملەكەتتەرى كىرەتىنى ءمالىم. وسىعان وراي 20 قاراشادا وتەتىن داۋىس بەرۋگە وسى ەلدە ۋاقىتشا جۇرگەن نەمەسە تۇراقتى تۇراتىن قازاقستان رەسپۋبليكاسىنىڭ قولدانىستاعى ءتولقۇجاتى بار بارلىق ازاماتتار كەلىپ، قاتىسا الادى»، - دەيدى №244 سايلاۋ ۋچاسكەسى كوميسسياسىنىڭ ءتوراعاسى ميراز اڭدابايەۆ.
داۋىس بەرۋشىلەر قاتارىندا تۋريستەر دە كوپ بولادى دەپ كۇتىلۋدە. ويتكەنى ساياسي ناۋقان كەزىندە تۇماندى البيوندا ساياحاتتاپ جۇرگەن وتانداستارىمىز ازاماتتىق بورىشتارىنا جاۋاپكەرشىلىكپەن قاراپ، سايلاۋ ۋچاسكەسىنە مىندەتتى تۇردە ات باسىن بۇرادى. ستۋدەنتتەر قاۋىمى دا بەلسەندىلىك تانىتادى دەگەن بولجام بار. تەك «بولاشاق» باعدارلاماسى بويىنشا بريتانيادا ءبىلىم الىپ جاتقان جاستاردىڭ سانى جۇزدەن اسادى.
«مەن لەستەر ۋنيۆەرسيتەتىنىڭ بيزنەس جانە كوشباسشىلىق باعىتى بويىنشا وقىپ جاتىرمىن. قازىرگى تاڭدا ءبىز وتانىمىزدا بولماساق تا، شەتەلدە جۇرسەك تە، ازاماتتىق بورىشىمىزدى وتەۋگە، وسى جەرگە كەلىپ، ءوز داۋىسىمىزدى بەرۋگە دايىنبىز»، - دەيدى لەستەر ۋنيۆەرسيتەتىنىڭ ماگيسترانتى قۋانىش ەسەنتاي.
تاڭەرتەڭگى ساعات 7-دە اشىلاتىن ۋچاسكە كەشكى ساعات 8-گە دەيىن جۇمىس ىستەيدى. ودان كەيىن سايلاۋ كوميسسياسىنىڭ مۇشەلەرى داۋىستاردى ساناۋ پروسەسىنە كىرىسەدى. ۋچاسكە جابىلعاننان كەيىن 1-2 ساعاتتىڭ كولەمىندە لوندونداعى داۋىس بەرۋ ناتيجەلەرى بەلگىلى بولماق. ساياسي ماڭىزى بار ناۋقاننىڭ الدىن الا ناتيجەلەرى ەرتەڭىندە جاريا ەتىلەدى.