استاناداعى كوپقاباتتى ۇيلەردىڭ بىرىندە جوندەۋ جۇمىستارى كەزىندە ليفت قۇلاپ، سالدارىنان ليفتكە قىزمەت كورسەتەتىن كومپانيانىڭ ءبىر قىزمەتكەرى قازا تاۋىپ، تاعى ەكى ادام جارالاندى.
وقيعاعا بايلانىستى زاڭگەر نۇرجىگىت سۇلتانبەك Jibek Joly تەلەارناسىنىڭ «بۇگىن LIVE» باعدارلاماسىندا پىكىر ءبىلدىردى، - دەپ حابارلايدى Aqshamnews.kz.
زاڭگەردىڭ ايتۋىنشا، قايعىلى وقيعا بويىنشا جاۋاپكەرشىلىك بىرنەشە تاراپقا جۇكتەلۋى مۇمكىن.
"بۇل جەردە ءۇش تاراپتىڭ دا جاۋاپكەرشىلىگى بار دەپ ويلايمىن: ءليفتىنى ورناتقان كومپانيا، وعان قىزمەت كورسەتەتىن مەكەمە جانە پاتەر يەلەرى كووپەراتيۆى. ءقازىر ادام ولىمىنە بايلانىستى تەرگەۋ ءجۇرىپ جاتىر. قىلمىستىق كودەكستىڭ 156-بابى بويىنشا ءىس قوزعالدى. تەرگەۋ ناتيجەسىندە ناقتى كىنالى تۇلعالار انىقتالىپ، ءتيىستى پروسەسسۋالدىق شەشىم قابىلدانادى"، - دەدى ول.
مامان جاراقاتتىڭ ءۇش ساناتى بولاتىنىن - جەڭىل، ورتاشا جانە اۋىر جاراقات، سونداي-اق ادام ولىمىنە اكەلگەن جاعدايدىڭ زاڭدا جەكە قاراستىرىلاتىنىن اتاپ ءوتتى. 156-باپقا سايكەس، كىنالى دەپ تانىلعاندارعا 5 جىلدان 10 جىلعا دەيىن باس بوستاندىعىنان ايىرۋ جازاسى قاراستىرىلعان.
سۇلتانبەكتىڭ ايتۋىنشا، ليفت ورناتىلعاننان كەيىن ونىڭ ءقاۋىپسىز پايدالانۋىنا قىزمەت كورسەتۋشى كومپانيا تىكەلەي جاۋاپتى.
«قىزمەت كورسەتۋشى مەكەمە اقاۋلاردى دەر كەزىندە انىقتاپ، جوسپارلى جوندەۋ جۇمىستارىن تۇراقتى جۇرگىزۋگە مىندەتتى. سونىمەن قاتار كەز كەلگەن جۇمىس بەرۋشى ەڭبەك كودەكسى بويىنشا قىزمەتكەرلەرىنىڭ قاۋىپسىزدىگىن قامتاماسىز ەتۋى ءتيىس»، – دەدى زاڭگەر.
ول قازاقستاندا ليفت كومپانيالارىن سەرتيفيكاتتايتىن ارنايى ورگان بار ەكەنىن، ءدال سول كوميتەت ليسەنزيا بەرىپ، جىل سايىن تەحنيكالىق رەگلامەنتكە ساي تەكسەرىس جۇرگىزەتىنىن دە اتاپ ءوتتى.
"تەكسەرىستەردى ونەركاسىپ جانە قۇرىلىس مينيسترلىگىمەن قاتار، جەرگىلىكتى اتقارۋشى ورگانداردىڭ تۇرعىن ءۇي ينسپەكسيالارى جۇيەلى تۇردە جۇرگىزۋى قاجەت"، – دەدى ساراپشى.
زاڭگەردىڭ ايتۋىنشا، ەلدەگى ليفتىلەردىڭ 40 پايىزىنان استامى توزعان، ولاردىڭ پايدالانۋ مەرزىمى كەي جاعدايدا 25–30 جىلعا سوزىلعان. ال مەملەكەتتىك ستاندارت بويىنشا ءليفتىنىڭ قىزمەت ەتۋ مەرزىمى - 20 جىل. استانادا 2028 جىلعا دەيىنگى رەنوۆاسيا باعدارلاماسى اياسىندا ەسكى ۇيلەردەگى ليفتىلەر مەن قاسبەتتەردى جاڭارتۋ جوسپارلانعان.