ەل اۋماعىنداعى كۇل ۇيىندىلەرىنىڭ كولەمى 1،41 ملرد تەكشە مەترگە جەتكەن.
ەنەرگەتيكا ءمينيسترى ەرلان اقكەنجەنوۆ ۇكىمەت وتىرىسىندا وسىنداي دەرەك كەلتىردى، دەپ حابارلايدى aqshamnews.kz.
— بۇگىنگى تاڭدا ەلىمىزدە 227 ەلەكتر ستانسياسى جۇمىس ىستەيدى. بۇل رەتتە ونىڭ ىشىندە كومىردى نەگىزگى وتىن رەتىندە پايدالاناتىن ءىرى ەنەرگيا ءوندىرۋشى ۇيىمداردىڭ سانى — 21. وسى ەنەرگيا ءوندىرۋشى ۇيىمدار اۋدانى 18،2 مىڭ گەكتار 27 كۇل ءۇيىندىسىن پايدالانادى. كۇل ۇيىندىلەرىنىڭ جالپى كولەمى — 8،23 ملرد تەكشە مەتر، ونىڭ 1،41 ملرد تەكشە مەترى تولتىرىلدى. 2024 جىلى كۇلدى وڭدەۋمەن اينالىساتىن كومپانيالار 69،2 مىڭ توننا كۇلدى وڭدەدى، — دەدى ول.
سونداي-اق، مينيستر كۇلدى وڭدەۋ اسىرەسە سەمەنت پەن بەتون ءوندىرۋ سالاسىنا ءتان ەكەنىن ايتتى.
— قازاقستاندا كۇلدىڭ قۇرامى ونەركاسىپ تالاپتارىنا سايكەس كەلمەيدى. قازاقستاندىق جىلۋ ەنەرگيا ورتالىقتارى مەن مەملەكەتتىك اۋداندىق ەلەكتر ستانسيالارى نەگىزىنەن قۇرامىندا جانبايتىن قوسپالارى جوعارى قوڭىر جانە تاس كومىردى پايدالانادى. سونداي-اق، كۇل-قوج قالدىقتارىندا كۇكىرت قوسىلىستارى مەن سىناپ، قورعاسىن، مىشياك سياقتى اۋىر مەتالدار بار، بۇل قۇرىلىستاعى كۇلدىڭ قۇنىن تومەندەتەدى. وسىعان بايلانىستى قوسىمشا تازالاۋ جانە قايتا وڭدەۋ قاجەت، بۇل سوڭعى ءونىمنىڭ وزىندىك قۇنىن ارتتىرادى، — دەدى ەرلان اقكەنجەنوۆ.