فانتاستيكا، كوميكستەر مەن كوركەم ادەبيەت.
ەلىمىpدەگى بالالار وسىنداي جانرلارداعى كىتاپتاردى وقيدى ەكەن. ول مادەنيەت جانە اقپارات مينيسترلىگىنىڭ 249 بالالار كىتاپحاناسى اراسىندا وقىرماندار سۇرانىسى بويىنشا جۇرگىزگەن تالداۋى ناتيجەسىندە بەلگىلى بولدى، دەپ حابارلايدى Almaty-akshamy.kz.
بيىل جاس وقىرماندار سانى 1 733 686 ادامعا جەتتى.
ساۋالناما ناتيجەسى بويىنشا بالالاردىڭ كىتاپحاناعا دەگەن قىزىعۋشىلىعى ارتىپ كەلەدى، ولار اسىرەسە فانتاستيكا، كوميكستەر مەن كوركەم ادەبيەت وقىعاندى ۇناتادى.
ەڭ كوپ وقىلاتىن كىتاپتار — بەردىبەك سوقپاقبايەۆتىڭ «بالالىق شاققا ساياحات»، «مەنىڭ اتىم قوجا»، سايىن مۇراتبەكوۆتىڭ «جابايى الما»، جوان ءروۋليڭنىڭ «ءحارري پوتتەر» جانە مارك تۆەننىڭ «توم سويەر» شىعارمالارى بولدى.
بايانعالي ءالىمجانوۆ، تولىمبەك ءابدىرايىم، زيرا ناۋرىزبايەۆا، سەرىكبول حاسان، زاۋرە تورەحان جانە باسقا اۆتورلاردىڭ شىعارمالارىن بالالار قىزىعۋشىلىقپەن وقىعان.
بالالار ءسۇيىپ وقيتىن باسىلىمنىڭ ءبىرى — كوميكستەر.
جاس وقىرماندار ۇلاربەك نۇرعالىم ۇلىنىڭ «ءىلياس پەن زاڭعاردىڭ پلانشەتى»، ورازحان جاقىپتىڭ «ەركەتاي»، ءىلياس يۋسۋفتىڭ «كەرەي مەن جانىبەك» شىعارمالارىن، سونداي-اق مايك ءبارفيلدتىڭ «كوميكستەگى الەم تاريحى»، «كوميكستەگى جاراتىلىستانۋ» اۋدارماسىن ۇناتادى.
قازاق ەرتەگىلەرى مەن الەم حالىقتارىنىڭ ەرتەگىلەرى بويىنشا «قازاق جانە الەم حالقىنىڭ ەرتەگىلەرى»، «اۆتورلىق ەرتەگىلەر»، «الاتاۋ ەرتەگىلەرى» «تاڭداۋلى ەرتەگىلەر»، چارلز پەررو مەن اعايىندى گريممدەردىڭ ەرتەگىلەرى كوپ سۇرالادى.
ايتا كەتەيىك، قازاقستانداعى بالالار كىتاپحانالارىنىڭ قىزمەتى بالانى تاربيەلەۋگە، ءبىلىم بەرۋگە، اقپاراتتاندىرۋعا جانە تۇلعالىق دامىتۋعا باعىتتالعان.