ەلدە سپيرتتىك ىشىمدىكتەر ساۋداسى قىزىپ تۇر

 2022 جىلى ەلدەگى دۇكەندەردە 139،9 ملن ليتردەن استام اراق، كونياك جانە سپيرت ساتىلعان.

 Energyprom.kz رەسۋرسىنىڭ ساراپتاماسىندا وسىنداي مالىمەت بەرىلگەن، دەپ حابارلايدى  Almaty-akshamy.kz قازاقپاراتقا سىلتەمە جاساپ. 

«بۇل – ەلدەگى سپيرتتىك ىشىمدىكتەر نارىعىنىڭ ستاتيستيكاسىنداعى ءابسوليۋتتى رەكورد. 2021 جىلمەن سالىستىرعاندا ىشكى نارىقتا سپيرتتىك ىشىمدىك ساتۋ كولەمى 90،4% ءوستى. ءوسىم نەگىزىنەن اراق پەن ليكەر-شاراپ ونىمدەرىنىڭ ساۋداسى ەسەبىنەن پايدا بولعان – 44،2 ميلليون ليتردەن 90،1 ميلليون ليترگە دەيىن ارتقان. سپيرت ساۋداسى دا قىزىپ، 29،3 ميلليون ليترگە جەتتى (پليۋس 68،1%). ال كونياك نارىعىندا 20،5 ميلليون ليتر ءونىم ساتىلعان (73،5% ءوسىم). قىزۋى جوعارى سپيرتتەن باسقا ىشىمدىك تۇرلەرىنە دەگەن سۇرانىس مۇنشالىقتى جوعارى بولعان جوق. شاراپ ساتۋ كولەمى 26،9%-عا، شامپان ساتۋ 28%-عا، سىرا ساتۋ 1،9%-عا ازايعان»، - دەپ جازىلعان ساراپتامادا.

ماقالادا مۇنداي ءوسىمنىڭ سەبەبى دە ايتىلعان.

«قازاقستاندا الكوگولگە دەگەن سۇرانىستىڭ وسىنشالىق ارتۋىن جالعىز جايتپەن بايلانىستىرۋعا بولادى. ەلدە، اسىرەسە، اراق پەن كونياكتى ايرىقشا كوپ كولەمدە تۇتىناتىنداردىڭ سانى كۇرت وسكەن. دۇنيەجۇزىلىك دەنساۋلىق ساقتاۋ ۇيىمىنىڭ دەرەگىنشە ، رەسەيلىكتەر قازاقستاندىقتارعا قاراعاندا ەكى ەسە كوپ ىشىمدىك ىشەدى (جان باسىنا شاققانداعى كورسەتكىش)»، - دەپ جازادى Energyprom.kz.