بۇگىندە 65 جاستان اسقان 80 مىڭعا جۋىق ەڭبەك ارداگەرى ءالى جۇمىس ىستەپ ءجۇر.
بۇل دەرەكتى ستاتيستيكا كوميتەتى كەلتىرىپ وتىر، دەپ حابارلايدى Almaty-akshamy.kz.
ماسەلە زەينەتكەرلەردىڭ ەڭبەك قابىلەتتىلىگىندە ەمەس، ولاردىڭ ءىزىن باساتىن جاس مامانداردىڭ تاپشىلىعىندا بولىپ وتىر.
قوستاناي وبلىسىندا 457 مىڭ گەكتار جەر ورمان شارۋاشىلىعىنىڭ تىكەلەي باقىلاۋىندا. مۇنداعى مامانداردىڭ دەنى - زەينەت جاسىنداعىلار. ويتكەنى ورمانشىلار تاپشى. ءقازىردىڭ وزىندە الىپ اۋماقتى قامتۋعا 300-گە جۋىق مامان قاجەت.
«كادرلار كەتىپ جاتىر. جاستار كوبىسى جۇمىس ىستەمەيدى. اسىرەسە، ءبىزدىڭ پاتريوتتار دەيمىز عوي اقساقالدار، شالداردى، جۇمىس ىستەپ جۇرگەن سولار»، - دەيدى ورمان شارۋاشىلىعىن قورعاۋ ينسپەكسياسىنىڭ باس ينجەنەرى بولاتبەك تابىلدين.
كوكشەدەگى ءسۇت وڭدەيتىن كاسىپورىننىڭ ينجەنەرى سەرىك سامەنوۆتىڭ زەينەتكە شىققانىنا بىرنەشە جىل بولعان. ءبىراق، ارداگەر مامان ءالى كۇنگە دەيىن سەحتاعى قوندىرعىلاردى تەكسەرىپ ءجۇر. ەڭبەك ءوتىلى 40 جىلدان اسقان 66 جاستاعى ينجەنەر جاستار كەلسە، بىلگەن-تۇيگەنىن ۇيرەتىپ، ەندىگى جەردە بەينەتتىڭ زەينەتىن كورسەم دەيدى.
«ءبىزدىڭ ماماندىققا ءقازىر جاستار تاپشى. ەڭبەك ەتۋگە كەلگەندەر كوپ جۇمىس ىستەمەيدى. بىر-ەكى ايدىڭ ىشىندە قايتادان كەتىپ قالادى. مەن سۇرانىس بويىنشا ءالى دە ەڭبەك ەتىپ جاتىرمىن. ورنىما قالدىراتىن جاستار تابىلماي وتىر»، - دەيدى ينجەنەر سەرىك سامەنوۆ.
جالپى، ستاتيستيكا كوميتەتىنىڭ مالىمەتىنشە، ەلىمىزدەگى زەينەت جاسىنداعى ەڭبەككەرلەردىڭ باسىم بولىگى سولتۇستىك ايماقتارعا تيەسىلى ەكەن. ماسەلەن:
قوستاناي وبلىسىندا 20،9 مىڭ ادام، اقمولا وبلىسىندا 20 مىڭ، سولتۇستىك قازاقستاندا 10،8 مىڭ، پاۆلودار وبلىسىندا 10،4 مىڭ زەينەتكەر ەڭبەك ەتىپ كەلەدى.
جالاقى ماردىمسىز بولعاندىقتان، جاستار اۋىلدان قالاعا اعىلادى. ءبىراق قالادا دا ولارعا جايلى جۇمىس بۇيىرا بەرمەيدى. ويتكەنى تاجىربيەسى از مامانداردى جۇمىسقا قابىلداۋى ەكىتالاي.
«قازاقتىڭ التىن بەسىگى - اۋىل. ءبىز سوندىقتان اۋىلدى ويلاپ، سول اۋىلدىڭ جەر ماسەلەسىندە، باعا ماسەلەسىندە، سۋبسيديا ماسەلەسىندە اۋىلعا جاردەم بەرمەسەك، "ديپلوممەن - اۋىلعا" دەپ ۇگىتتەگەننەن ەشتەڭە بولمايدى. ولاردى ماتەريالدىق تۇرعىدا، ياعني اقشامەن، "اۋىلدا جۇمىس ىستەسەڭ، باي بولاسىڭ" دەپ قانا ىنتالاندىرساق بولادى»، - دەيدى ەكونوميست ساپارباي جۇبايەۆ.
ال ەڭبەك جانە حالىقتى الەۋمەتتىك قورعاۋ مينيسترلىگى ەلىمىزدە 23 پەن 35 جاس ارالىعىنداعى 12 مىڭ ازامات رەسمي جۇمىسسىز رەتىندە تىركەلگەنىن ايتادى. ءبىراق، ەكى قولعا ءبىر كۇرەك تابا الماي جۇرگەن جاستاردىڭ اۋىلعا بارعىسى جوق.