ەلدە قانشا سوعىس ارداگەرى قالدى؟

ءقازىر قازاقستاندا ۇلى وتان سوعىسىنىڭ 222 قاتىسۋشىسى بار.

مۇنداي مالىمەتتى ەڭبەك جانە حالىقتى الەۋمەتتىك قورعاۋ مينيسترلىگى بەرگەن، دەپ حابارلايدى Almaty-akshamy.kz.

سونداي-اق ۇوس كەزىندە جارالانعان، مۇگەدەكتىگى بار ادامدار جانە جەڭىسكە ۇلەس قوسقان  60 106 ازامات تۇرادى.

اتاپ ايتقاندا، قورشاۋداعى لەنينگراد تۇرعىندارى – 78 ادام؛ كونسلاگەرلەردىڭ بۇرىنعى كامەلەتكە تولماعان تۇتقىندارى – 175 ادام؛ ۇوس كەزىندە جارالانعان، كونتۋزياسى، زاقىمدانۋى نەمەسە اۋرۋى سالدارىنان مۇگەدەكتىگى بار قايتىس بولعان ادامنىڭ جۇبايلارى – 2 413 ادام؛ ۇوس – دا قازا تاپقان (قايتىس بولعان، حابار-وشارسىز كەتكەن) جاۋىنگەرلەردىڭ جەسىرلەرى – 4 ادام؛ تىل ەڭبەككەرلەرى – 57 436 ادام.

«ۇوس كەزىندە مايدانعا 1 ملن 200 مىڭنان استام قازاقستاندىق شاقىرىلدى، 20-دان استام اتقىشتار ديۆيزياسى مەن باسقا دا قۇرىلىمدار قۇرىلدى. اسكەري قىزمەتى ءۇشىن جۇزدەگەن مىڭ قازاقستاندىق مەدالدارمەن جانە وردەندەرمەن ماراپاتتالدى، 500-گە جۋىق ادام كەڭەس وداعىنىڭ باتىرى اتاندى. ءتورت قازاقستاندىق ەكى رەت باتىر اتاندى، 110 قازاقستاندىق ءۇش دارەجەلى داڭق وردەنىمەن ماراپاتتالدى. قولىنا قارۋ العان ءاربىر ەكىنشى قازاقستاندىق جەڭىس ءۇشىن ءوز ءومىرىن قيدى. ولار شايقاستا قازا تاۋىپ، حابار-وشارسىز كەتتى. تۇتقىننان 630 مىڭ ادام ورالمادى»، - دەلىنگەن حابارلامادا.

قازاقستاندا جەڭىس كۇنىنە وراي ۇوس ارداگەرلەرىنە 1،5 ملن تەڭگە مولشەرىندە ءبىرجولعى ماتەريالدىق كومەك كورسەتىلەدى.