ەلىمىزدە ءولىم-جىتىم كورسەتكىشى پاندەمياعا دەيىنگى دەڭگەيگە ورالدى.
بىلتىر ەلىمىزدە 134،7 مىڭ ادام قايتىس بولدى، بۇل – 2021 جىلمەن سالىستىرعاندا تورتتەن بىرگە از، دەپ حابارلايدى Almaty-akshamy.kz قازاقپاراتقا سىلتەمە جاساپ.
وتكەن جىلى ءولىم-جىتىمنىڭ جالپى كوەففيسيەنتى پاندەمياعا دەيىنگى كەزەڭنەن تومەندەدى.
قازاقستاندىقتاردى ولىم-جىتىمگە ءجيى ۇشىراتاتىن سەبەپتەردىڭ ءبىرى – جۇرەك-قان تامىرلارى اۋرۋلارى.
پاندەميا كەزىندە (2020-2021 ج.ج.) ءولىم-جىتىم شامادان تىس تىركەلىپ، كورسەتكىش الدىڭعى جىلدارعا قاراعاندا كۇرت ارتتى. قايتىس بولعانداردىڭ جالپى سانى 2020 جىلى 21،2%، 2021 جىلى 37%-عا ارتقان. ايتا كەتەرلىگى، ءولىم-جىتىمنىڭ بارلىعى تىكەلەي COVID-19 ينفەكسياسىمەن بايلانىستى ەمەس. وتكەن جىلى كوبىنە قان اينالىمى جۇيەسى اۋرۋلارىنا شالدىعۋدىڭ سوڭى ولىمگە الىپ كەلگەن. ەكىنشى ورىندا – قاتەرلى ىسىك جانە سوعان ۇقساس دەرتتەر. ال، تىنىس الۋ ورگاندارىنىڭ اۋرۋلارى ءۇشىنشى ورىندا.
ۇلتتىق ستاتيستيكا بيۋروسىنىڭ دەرەكتەرىندە حالىقارالىق جىكتەمە بويىنشا اۋرۋلاردىڭ ءىرى توپتارى عانا قامتىلعان. ولاردىڭ قاتارىنا قازاقستانداعى بارلىق ءولىم-جىتىمنىڭ شامامەن 60%-ى كىرەدى. قالعان سەبەپتەر، ياعني 40،1% نەمەسە 54 مىڭ جاعداي رەسمي ستاتيستيكادا ناقتىلانباعان.
2022 جىلى جۇرەك جانە قان اينالىمى اۋرۋلارىنان قايتىس بولعاندار سانى باسقا اۋرۋلارعا قاراعاندا تومەندەگەن. وسىلايشا، ەلىمىزدە ينفاركت، ينسۋلت جانە جۇرەك-قان تامىرلارى جۇيەسى پروبلەماسىمەن قايتىس بولعاندار سانى 13 مىڭ ادامعا ازايعان.
پاندەميادان كەيىن تىنىس الۋ ورگاندارى اۋرۋلارىنان بولاتىن ءولىم-جىتىم كورسەتكىشى 7،7 مىڭ جاعدايعا نەمەسە 36،9%-عا ازايعان. وتكەن جىلى قايتىس بولعان قازاقستاندىقتار سانى 2019 جىلعىدان ازايدى. بيىل قاڭتاردا دەنساۋلىق ساقتاۋ ءمينيسترى اجار عينيات ءولىم-جىتىم بويىنشا وتكەن جىلعى ستاتيستيكانى كەلتىرگەن بولاتىن.
«بىلتىر حالىققا مەديسينالىق كومەك كورسەتۋدىڭ تيىمدىلىگىن ارتتىرۋ بويىنشا كەشەندى جۇمىس جۇرگىزىلدى. ناتيجەسىندە دەنساۋلىق ساقتاۋدىڭ نەگىزگى مەديسينالىق-دەموگرافيالىق كورسەتكىشتەرىنىڭ وڭ ديناميكاسى بايقالادى»، - دەگەن بولاتىن ا. عينيات.
مەملەكەتتىك بيۋدجەتتەن اۋرۋحانالارعا بولىنگەن قارجىعا قاراعاندا، مەديسينالىق قىزمەتتەر مەن ونىڭ تيىمدىلىگىن ارتتىرۋعا كوپ قاراجات قارالعان. كورسەتىلگەن قىزمەتتەر سانىنىڭ ءوسۋى مەديسينالىق مەكەمەلەردىڭ قارجىلىق كورسەتكىشىنە اسەر ەتەدى. مەملەكەتتىڭ مەديسينالىق مەكەمەلەرگە 2021-2022 جىلدارى تولەگەن قاراجاتتىڭ جالپى كولەمىن سالىستىرساق، ايىرماشىلىق وتە از (+2،3%).
قارجى بويىنشا 2021 جىلى اۋرۋحانالار قىزمەت كورسەتكەنى ءۇشىن مەملەكەتتەن 1،98 ترلن تەڭگە، ال بىلتىر 2،02 ترلن تەڭگە الدى. ايىرماشىلىق – 44 ملرد تەڭگە.
دۇنيەجۇزىلىك دەنساۋلىق ساقتاۋ ۇيىمى ساراپشىلارىنىڭ پىكىرىنشە، پاندەميا كەزىندە ءولىم-جىتىمنىڭ كوبەيۋىنە اسەر ەتكەن تاعى ءبىر سەبەپ – اۋرۋحانالار مەن ەمحانالاردا پاسيەنتتەردىڭ شامادان تىس بولۋى. سالدارىنان ەم الۋ قولجەتىمسىز بولدى.