ەلباسى نۇرسۇلتان نازاربايەۆ جامبىل وبلىسىنداعى الەۋمەتتىك-مادەني نىساندارعا باردى.
قازاقستاننىڭ تۇڭعىش پرەزيدەنتى الدىمەن جامبىل وبلىسىنىڭ اكىمى ب.ساپاربايەۆپەن كەزدەستى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
كەزدەسۋدە ەلباسىعا اسكەري قويماداعى جارىلىستان زارداپ شەككەن بايزاق اۋدانى تۇرعىندارىنا كومەك كورسەتۋ شارالارى جانە قالپىنا كەلتىرۋ جۇمىستارى تۋرالى مالىمەت بەرىلدى. جامبىل وبلىسىنىڭ اكىمى ەلباسىعا ءوڭىردىڭ الەۋمەتتىك-ەكولوگيالىق دامۋى، Nur Otan پارتياسىنىڭ سايلاۋالدى باعدارلاماسىنىڭ جۇزەگە اسىرىلۋ بارىسى جايلى، سونداي-اق اگرارلىق سەكتورداعى ماسەلەلەردى شەشۋگە جانە حالىقتى جۇمىسپەن قامتۋعا باعىتتالعان شارالار تۋرالى باياندادى.
قازاقستاننىڭ تۇڭعىش پرەزيدەنتى ءوڭىر باسشىلىعىنىڭ جۇمىسىنا وڭ باعا بەردى. كەزدەسۋدەن كەيىن ەلباسى «ءالجان انا» تاريحي مۋزەيىنىڭ قىزمەتىمەن تانىسىپ، مەكەمە اۋماعىنا اعاش وتىرعىزۋ راسىمىنە قاتىستى.
قازاقستاننىڭ تۇڭعىش پرەزيدەنتى سونداي-اق اۋىلداعى مادەنيەت ۇيىنە باردى. بۇل مادەنيەت ۇيىندە كىتاپحانا جانە ءتۇرلى ۇيىرمەلەر جۇمىس ىستەيدى، 250 ورىندىق كونسەرت زالى بار. ن.نازاربايەۆ جامبىل وبلىستىق فيلارمونياسىنىڭ ارتيستەرى مەن اۋداندىق مادەنيەت ءۇيىنىڭ شاكىرتتەرى ورىنداعان مۋزىكالىق شىعارمالاردى تىڭدادى.
ەلباسى سونداي-اق سپورتتىق-ساۋىقتىرۋ كەشەنىنىڭ جۇمىس بارىسىمەن تانىستى. اتالعان كەشەندە اۋقىمدى ارەنا، امبەباپ زال جانە كۇرەس پەن بوكسقا ارنالعان زال بار. بۇگىندە سپورتتىق-ساۋىقتىرۋ كەشەنىندە ءتورت جۇزدەن استام بالا مەن جەتكىنشەك سپورتتىڭ ەركىن كۇرەس، تاەكۆوندو، كاراتە، ۆولەيبول، فۋتبول، بوكس سىندى التى ءتۇرى بويىنشا جاتتىعادى.