«ەل تىرەگى – ەلباسى» اتتى سالتاناتتى جيىن ءوتتى

ءتۇرلى سالا ماماندارى قالا اكىمىنىڭ العىس حاتىمەن ماراپاتتالدى

تۇڭعىش پرەزيدەنت كۇنىنە وراي «ەل تىرەگى – ەلباسى» اتاۋىمەن شىمكەنت قالاسىندا سالتاناتتى جيىن ءوتتى، دەپ حابارلايدى Almaty-akshamy.kz اikyn.kz-كە سىلتەمە جاساپ.

مەرەكەلىك كەشتە ۇلت كوشباسشىسىنىڭ ەلىمىزدىڭ ەگەمەندىك العان جىلدارىنان باستاپ، مەملەكەتتىڭ دامۋى مەن وركەندەۋى جولىنداعى ەرەن ەڭبەگى جايلى «ەلباسى جولى» بەينەفيلمى كورسەتىلدى. ەكونوميكانى نىعايتىپ، ىشكى كەلىسىمدى بەكەمدەپ، وزگە ەلدەرمەن ديپلوماتيالىق بايلانىستار ورناتۋداعى ەلباسىنىڭ ىسكەرلىگى مەن كەمەڭگەرلىگى ەرەكشە اتالدى.
مەرەكەگە وراي وتكىزىلگەن سالتاناتتى جيىندا شىمكەنت قالاسىنىڭ دامۋىنا ۇلەس قوسىپ كەلە جاتقان ءتۇرلى سالا ماماندارى قالا اكىمىنىڭ العىس حاتىمەن ماراپاتتالدى. ولاردىڭ ىشىندە كوز جانارىنان ايىرىلىپ، زاعيپ بولىپ قالعانىنا قاراماستان، اۋلا سىپىرۋشى بولىپ جۇمىس ىستەيتىن نۇرتىلەۋ جانالييەۆ تە بار. ول شاھارداعى كوممۋنالدىق تازالىق مەكەمەسىندە 11 جىلدان بەرى ۇزدىكسىز ەڭبەك ەتىپ كەلەدى. جىگەرلى جان مەرەكە قارساڭىندا ەرەكشە قۋانىشقا بولەنگەنىن ايتتى.

– تازالىقتى سۇيەمىن. سوندىقتان دا اۋلا سىپىرۋشى بولىپ ەڭبەك ەتەمىن. قالانىڭ تازالىعىنا ۇلەس قوسىپ كەلەمىن. مەن ءۇشىن بۇگىن ۇلكەن قۋانىش. بۇل – مەنىڭ العاشقى ماراپاتىم، – دەيدى كوممۋنالدىق تازالىق مەكەمەسىنىڭ جۇمىسشىسى نۇرتىلەۋ جانالييەۆ.

اتاۋلى كەشكە ەسترادا جۇلدىزدارى دا قاتىسىپ، ەلدىك جولىنا ارنالعان اندەردى ورىندادى. كەش سوڭىندا «جاس ۇلان» مەكتەبىنىڭ 100 ساربازى ەلباسىنىڭ سوزىنە جازىلعان «ەلىم مەنىڭ» ءانىن شىرقادى.