رەفەرەندۋمنىڭ كوپتەگەن ماڭىزدى اسپەكتىلەرى بار
الماتىدا حالىقارالىق اقپاراتتىق تەحنولوگيالار ۋنيۆەرسيتەتىندە (حاتۋ) «قازاقستانداعى رەسپۋبليكالىق رەفەرەندۋم» اتتى دوڭگەلەك ۇستەل ءوتتى، وعان قوعام مەن ب ا ق وكىلدەرى، ساراپشىلار، ۋنيۆەرسيتەتتىڭ پروفەسسورلىق-وقىتۋشىلار قۇرامى مەن ستۋدەنتتەرى قاتىستى، دەپ حابارلايدى Almaty-akshamy.kz.
شارانى اشقان باسقارما ءتوراعاسى، حاتۋ رەكتورى اسقار حيكمەتوۆ الداعى رەفەرەندۋم ەلىمىزدىڭ تاريحىنداعى جاڭا كەزەڭ بولاتىنىن اتاپ ءوتتى.
«رەفەرەندۋمنىڭ كوپتەگەن ماڭىزدى اسپەكتىلەرى بار، ساياسي جۇيە تۇبەگەيلى وزگەرۋدە. ءبىز حالىق بيلىگىن نىعايتۋدىڭ، جاڭا ازاماتتىق قوعامدى قالىپتاستىرۋدىڭ، پارلامەنتتىڭ ءرولىن ارتتىرۋدىڭ جانە باسقا دا كوپتەگەن تۇبەگەيلى وزگەرىستەردىڭ ناعىز دەموكراتيالىق جانە دۇرىس جولىن كورىپ وتىرمىز. ال ەڭ باستىسى، كونستيتۋسياعا وزگەرتۋلەر مەن تولىقتىرۋلار جالپىحالىقتىق، دەموكراتيالىق جولمەن، جالپىحالىقتىق رەفەرەندۋم ارقىلى قابىلدانادى – ازاماتتار بۇل تاريحي جانە ەل بولاشاعى ءۇشىن ماڭىزدى وقيعاعا قاتىسا الادى. اركىمنىڭ داۋىسى ماڭىزدى!»، - دەپ تۇيىندەدى رەكتور اسقار حيكمەتوۆ.
شارادا ءسوز العان بايانداماشىلار جۇرگىزىلىپ جاتقان كونستيتۋسيالىق رەفورمانىڭ ءمانىن، اتا زاڭىمىزداعى باپتاردىڭ ۇشتەن بىرىنە ەنگىزىلىپ جاتقان وزگەرىستەردى، ەكىنشى رەسپۋبليكانى قۇرۋ جولىن تىلگە تيەك ەتتى. جيىندا رەفورمالار قوردالانعان ماسەلەلەردى شەشۋگە جانە قوعامدى ودان ءارى دەموكراتيالاندىرۋعا، مەملەكەتتىلىكتى نىعايتۋعا باعىتتالعانى ايتىلدى. رەفەرەندۋم ەلىمىزدىڭ ساياسي ومىرىندەگى بەتبۇرىس كەزەڭى، جاڭا قازاقستاندى قۇرۋداعى ماڭىزدى قادام بولاتىنى باسا ايتىلدى.
دوڭگەلەك ۇستەل بارىسىندا قاتىسۋشىلار ءوزارا پىكىر الماسىپ، ستۋدەنتتەر وزدەرىن تولعاندىرعان سۇراقتارىنا جاۋاپ الا الدى. جيىن سوڭىندا سپيكەرلەر جاستار مەن ستۋدەنتتەردى مەملەكەت باسشىسى قاسىم-جومارت توقايەۆتىڭ كونستيتۋسيالىق رەفورمانى جۇزەگە اسىرۋ جونىندەگى باستامالارىن قولداۋعا، 5 ماۋسىمدا وتەتىن رەفەرەندۋمعا بەلسەندى تۇردە قاتىسىپ، ءوز تاڭداۋىن جاساۋعا شاقىردى.