بۇل تۋرالى قاسىم-جومارت توقايەۆ VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسىندا ايتتى.
مەملەكەت باسشىسى ۇكىمەت پەن پارلامەنتكە گەولوگيالىق بارلاۋ جانە كەنىشتەردى يگەرۋ ىسىنە ينۆەستيسيا تارتىپ، سالاعا قاتىستى ناقتى شارالار ازىرلەۋدى تاپسىردى، دەپ حابارلايدى Almaty-akshamy.kz.
«ەلىمىزدىڭ وندىرىستىك الەۋەتىن بارىنشا ارتتىرۋ ماڭىزدى. قازاقستان ەكونوميكاسى ءالى كۇنگە دەيىن پايدالى قازبالارعا تاۋەلدى بولىپ وتىر، ياعني ەل ەكونوميكاسىنىڭ قۇرىلىمى قاراپايىم. شىن مانىندە، بىزگە قارقىندى دامۋ ءۇشىن كۇردەلى، ءارتاراپتى ەكونوميكالىق قۇرىلىم قاجەت. ارينە، شيكىزات نارىعىنداعى الەمدىك باسەكەدە ءبىزدىڭ ءوز ارتىقشىلىعىمىز بار. قازىرگى جانە ستراتەگيالىق مىندەتتەردى ورىنداۋ ءۇشىن ونى ءتيىمدى پايدالانۋ قاجەت. سوندىقتان، وسى سالانى ودان ءارى دامىتا بەرۋ كەرەك»، - دەدى قاسىم-جومارت توقايەۆ پارلامەنتتىڭ VIII شاقىرىلىمىنىڭ ءبىرىنشى سەسسياسىندا.
«ءبىراق، جەر قويناۋىن پايدالانۋ سالاسىندا ونداعان جىل بويى قوردالانعان پروبلەمالار از ەمەس. گەولوگيالىق بارلاۋ جۇمىستارىنىڭ ويداعىداي جۇرگىزىلمەۋى تاۋ-كەن ونەركاسىبىن وركەندەتۋگە كەدەرگى كەلتىرىپ وتىر. مينەرالدى شيكىزات بازاسىن تولىقتىرۋ قارقىنى باسەڭدەپ بارادى. ونىڭ ۇستىنە، ءقازىر يگەرىلىپ جاتقان كەن ورىندارىنىڭ قورى سارقىلا باستادى»، - دەيدى پرەزيدەنت.
سونداي-اق، مەملەكەت باسشىسى قازبا بايلىقتى ءتيىمدى جانە ۇنەمدى پايدالانۋ قاجەتتىگىن ايتتى.
«ول ءۇشىن زاڭنامانى جاقسارتىپ، راسىمدەردى جەڭىلدەتۋ كەرەك. گەولوگيالىق بارلاۋ جانە كەنىشتەردى يگەرۋ ىسىنە ينۆەستيسيا تارتۋ ايرىقشا ماڭىزدى. ۇكىمەت پەن پارلامەنت وسى سالاعا قاتىستى ناقتى شارالار ازىرلەۋى ءتيىس»، - دەدى قاسىم-جومارت توقايەۆ.