جينالىستا اتا-انالاردىڭ بالا ومىرىندەگى، سونداي-اق ونلاين كەڭىستىكتەگى قاۋىپسىزدىگىنە قاتىستى جاۋاپكەرشىلىگى تۋرالى ءسوز قوزعالادى.
ەلىمىزدىڭ بارلىق مەكتەپتەرىندە بالالاردىڭ قاۋىپسىزدىگىنە ارنالعان اتا-انالار جينالىسى وتەدى، دەپ حابارلايدى aqshamnews.kz
اتا-انالارعا قاۋىپ-قاتەرلەردى دەر كەزىندە قالاي انىقتاۋ جانە ولاردى بولدىرماۋ ءۇشىن قانداي شارالار قولدانۋ كەرەكتىگى تۋرالى قادامدىق ۇسىنىمدار بەرىلەدى. ولاردىڭ ىشىندە - بالانىڭ مىنەز-قۇلقىن باقىلاۋ، الەۋمەتتىك جەلىلەردەگى بەلسەندىلىك مونيتورينگى، مەكتەپ ورتاسىنداعى قۇرداستارىمەن قارىم-قاتىناسى كىرەدى. بۇدان بولەك، ماماندار بالامەن تۇراقتى قارىم-قاتىناس جاساۋدىڭ، اشىق ديالوگ ءۇشىن سەنىمدى ورتا قۇرۋدىڭ جانە اتا-انالاردىڭ بالاسىنىڭ ومىرىنە ۇدايى قاتىسۋىنىڭ ماڭىزدىلىعىنا نازار اۋداردى.
«بالا قاۋىپسىزدىگى اتا-انا، پەداگوگ، ءاربىر ەرەسەك ادام ءۇشىن باسىمدىققا يە بولۋى ءتيىس. بالامەن اشىق ديالوگ قۇرۋ، ونىڭ ومىرىنە ۇدايى قاتىسىپ وتىرۋ، سيفرلىق قۇرىلعىلاردى باقىلاۋ جانە بالامەن قاۋىپسىزدىك تاقىرىبىندا اڭگىمەلەسۋ - بۇل پروبلەمالاردىڭ الدىن الۋعا كومەكتەسەتىن نەگىزگى قادامدار. اتا-انالاردىڭ مىندەتى تەك بالانىڭ ءجۇرىس-تۇرىسىن باقىلاپ قانا قويماي، سونىمەن قاتار ءوز بالاسىمەن ونى ءارقاشان تىڭداۋعا جانە كومەكتەسۋگە دايىن ەكەنىن بىلدىرەتىن سەنىمدى قارىم-قاتىناس قالىپتاستىرۋ. بالا ءبىزدىڭ بولاشاعىمىز، ولاردىڭ سالاماتتىلىعىن ساقتاۋ تىكەلەي بىزگە بايلانىستى»، - دەدى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
بيىلعى وقۋ جىلىنان باستاپ ءبىلىم بەرۋ ۇيىمدارىندا اپتا سايىن سىنىپ ساعاتتارى اياسىندا «قاۋىپسىزدىك ساباقتارى» وتۋدە، ساباق كەزىندە ينتەرنەتتەگى تاۋەكەلدەن قورعانۋ، ءوزىن-وزى ساقتاۋ داعدىلارىن دامىتۋ جانە ءتۇرلى قاۋىپ-قاتەرلەر جاعدايىندا دۇرىس ارەكەت ەتۋ تاقىرىپتارى قامتىلۋدا. سونداي-اق بالالار مەن اتا-انالار جانە پەداگوگتەر ءۇشىن پسيحولوگيالىق، قۇقىقتىق جانە ادىستەمەلىك كەڭەس الۋعا بولاتىن پسيحولوگيالىق قولداۋ ورتالىقتارى اشىلدى. ال بالالارعا جاسالعان قاتىگەزدىككە كۋا بولساڭىز، تاۋلىك بويى قىزمەت ەتەتىن «111» نومىرىنە حابارلاسۋعا بولادى.