رۇقسات ەتىلمەگەن قوقىستاردىڭ بولۋى بۇگىنگى تاڭدا ءبىرىنشى كەزەكتەگى ماسەلەلەردىڭ ءبىرى بولىپ تابىلادى.
قازاقستاندىق ەكولوگتار رەسپۋبليكا بويىنشا ءبىرقاتار وڭىرلەردە رۇقسات ەتىلمەگەن قوقىس ۇيىندىلەرىنىڭ الدىن الۋ جانە جويۋ بويىنشا رەيدتىك ءىس-شارالار وتكىزدى. ناتيجەسىندە 4 763 رۇقسات ەتىلمەگەن قوقىس ءۇيىندىسىن انىقتادى، دەپ حابارلايدى Almaty-akshamy.kz.
قولايلى ەمەس ستاتيستيكانى ەسكەرسەك، بۇل پروبلەمانى شەشۋ بارلىق مۇددەلى ۇيىمداردى، ونىڭ ىشىندە قوعامدى تارتا وتىرىپ، تۇبەگەيلى شارالاردى قولدانۋدى تالاپ ەتەدى.
«بۇعان دەيىن مەملەكەت باسشىسى ق ر ۇكىمەتىنىڭ سوڭعى كەڭەيتىلگەن وتىرىسىندا وسىنداي تاپسىرما بەرگەن بولاتىن جانە ونى ورىنداۋ اياسىندا ق ر ەكولوگيا، گەولوگيا جانە تابيعي رەسۋرستار مينيسترلىگى ق ر اقپارات جانە قوعامدىق دامۋ مينيسترلىگىمەن بىرلەسىپ رۇقسات ەتىلمەگەن قوقىس ۇيىندىلەرىن انىقتاۋ جانە ولاردىڭ پايدا بولۋىنىڭ الدىن-الۋ بويىنشا اۋقىمدى ءىس-شارا ۇيىمداستىردى. ءبىرىنشى رەيد اعىمداعى جىلدىڭ 24 ماۋسىمىندا باستالدى جانە ونى ءبىر مەزگىلدە بەس ءىرى ءوڭىر: قاراعاندى، پاۆلودار، الماتى، اقمولا جانە شىعىس قازاقستان وبلىستارى وتكىزدى»، – دەلىنگەن ەكولوگيا، گەولوگيا جانە تابيعى رەسۋرستار مينيسترلىگىنىڭ باسپا ءسوز قىزمەتىنىڭ حابارلاماسىندا.
مامانداردىڭ حابارلاۋىنشا، رەكرەاسيالىق ايماقتارعا ەكولوگيا دەپارتامەنتتەرىنىڭ، اكىمدىكتەردىڭ، جەرگىلىكتى پوليسيا قىزمەتىنىڭ وكىلدەرى جانە 30-دان استام ەكوۆولونتەرلەر شىقتى.
ءبىر كۇندىك جۇمىس ناتيجەسىندە 20 زاڭسىز قوقىس ورنى انىقتالدى، ولاردىڭ 13ء-ى سول كۇنى جويىلدى. سونىمەن قاتار، 6 ەسكەرتۋ بەرىلىپ، 10 اەك كولەمىندە اكىمشىلىك ايىپپۇل سالىندى.
ەكولوگتار بۇل رەيدتىك ءىس-شارالاردىڭ باستاماسى عانا ەكەنىن ەسكەرتىپ وتىر. اپاتتى ۇيىندىلەردى جويۋ كەستەسى اعىمداعى جىلدىڭ قىركۇيەك ايىنىڭ سوڭىنا دەيىن بارلىق وڭىرلەرگە مەرزىمدى ساپارلاردى قاراستىرادى.كەيىنگى رەيدتەردىڭ ناتيجەلەرى قوسىمشا جاريالاناتىن بولادى.
