تامىز كونفەرەنسياسىندا كوتەرىلگەن تاقىرىپتىڭ ءبىرى ەلدەگى ەكولوگيالىق مادەنيەتتى دامىتۋعا ارنالدى.
وقۋ-ادىستەمەلىك قۇرال recycle.kz سايتىنداعى «ەكولوگيالىق ءبىلىم» بولىمىندە كوپشىلىك قولدانۋى ءۇشىن جۇكتەۋگە قويىلادى، دەپ حابارلايدى Almaty-akshamy.kz ق ر ەكولوگيا، گەولوگيا جانە تابيعي رەسۋرستار مينيسترلىگىنە سىلتەمە جاساپ.
ۇستازدار قاۋىمىنىڭ ماجىلىسىنە ءبىلىم باسقارماسىنىڭ وكىلدەرى، نۇر-سۇلتان قالاسىنىڭ ءبىلىم بەرۋدى جاڭعىرتۋ ورتالىعىنىڭ وكىلدەرى، وكم وپەراتورى جانە نۇر-سۇلتان، قاراعاندى، تەمىرتاۋ، سەمەي، پەتروپاۆل، وسكەمەن قالالارىنىڭ ءبىلىم بەرۋ مەكەمەلەرىنىڭ وكىلدەرى قاتىستى.
ەكولوگيالىق ءبىلىم بەرۋدى دامىتۋداعى ماڭىزدى ماسەلەلەردىڭ ءبىرى - وقۋ ۇردىسىنە ەكولوگيا تاقىرىبىنداعى ماتەريالدى بىرىكتىرۋ. كومپانيانىڭ باسقارۋشى ديرەكتورى وكم وپەراتورى قايراتعالي حايرۋللا «ەكولوگيالىق ءبىلىمدى وقۋ جۇيەسىنە ينتەگراسيالاۋ» اتتى العاشقى ادىستەمەلىك قۇرالدى تانىستىردى. مۇنداي قۇرالدى مەكتەپ باعدارلاماسىنا ەنگىزۋ وسكەلەڭ ۇرپاققا ەكولوگيالىق مادەنيەتتى وڭتايلى سىڭىرۋگە مۇمكىندىك بەرەدى. اتالعان جوبادا بارلىق مەكتەپ پەن مەكتەپكە دەيىنگى پاندەر قامتىلىپ وتىر.
ادىستەمەلىك قۇرال بەس نەگىزگى بولىكتەن تۇرادى. ءبىرىنشى بولىمدە مەكتەپكە دەيىنگى جانە باستاۋىش سىنىپتارعا ارنالعان ماتەماتيكالىق جانە ادەبي وقۋ ماتەريالدارى بىرىكتىرىلگەن. ەكىنشىسىندە ورتا جانە جوعارى سىنىپتاردىڭ وقۋ پروسەسىنە ەكو-بىلىم بەرۋدى ەنگىزۋ بويىنشا جۇمىستار كورسەتىلگەن. ءۇشىنشى بولىمدە نۇر-سۇلتان قالاسى وقۋشىلارىنىڭ ەكولوگيا تاقىرىبىنا ارنالعان ۇزدىك ەسسەلەرى جيناقتالعان. سوڭعى ەكەۋى قورشاعان ورتاعا قاتىستى پراكتيكالىق ماقساتتارعا قول جەتكىزۋگە باعىتتالىپ وتىر.