ەلىمىزدەگى 10 قالادا اۋانىڭ جوعارى لاستانۋى ساقتالىپ وتىر.
بۇل تۋرالى ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اتموسفەرالىق اۋانىڭ يندۋستريا تاراپىنان لاستانۋى ەكولوگيالىق رەتتەۋ اياسىندا لاستاۋشى زاتتاردىڭ شىعارىندىلارى مەن توگىندىلەرىن رەتتەۋ نەگىزىندە جۇزەگە اسىرىلادى. وسى باعىتتا بىلتىر ناقتى شىعارىندىلاردىڭ كولەمى 2021 جىلعا قاراعاندا 4،1 پايىزعا، ال توگىندىلەر كولەمى 11،7 پايىزعا قىسقاردى. سونىمەن قاتار جۇيەلى تۇردە اۋانى لاستاعانى، ەكولوگيالىق زاڭنامانى بۇزعانى ءۇشىن اتىراۋ مۇناي وڭدەۋ زاۋىتىنىڭ ەكولوگيالىق رۇقساتىن توقتاتا تۇرۋ بويىنشا ءىس سوتقا جولدانعان بولاتىن. قابىلدانعان شارالارعا قاراماستان ەلىمىزدىڭ 10 قالاسىندا اۋانىڭ جوعارى لاستانۋى ساقتالۋدا. وسى قالالارعا استانا، الماتى، قاراعاندى، تەمىرتاۋ، اتىراۋ، اقتوبە، بالقاش، وسكەمەن، جەزقازعان، ريددەر كىرەدى»، - دەدى ول مينيسترلىكتىڭ كەڭەيتىلگەن القا ماجىلىسىندە.
جالپى، ونىڭ اتاپ وتۋىنشە، ەلىمىزدەگى ەكولوگيالىق احۋالدى جاقسارتۋ جۇمىستارى قابىلدانعان جاڭا ەكولوگيالىق كودەكس، بەكىتىلگەن «جاسىل قازاقستان» ۇلتتىق جوباسى، وڭىرلەردەگى ەكولوگيالىق جاعدايدى جاقسارتۋ بويىنشا جول كارتالارى اياسىندا ىسكە اسىرىلىپ جاتىر.
«ايتا كەتەتىن جايت، قابىلدانعان جول كارتالارى قوعامدى كەڭىنەن تارتۋ نەگىزىندە قالىپتاستىرىلعان جانە 485 ءىس-شارانى قامتيدى. جاڭا وبلىستاردا جول كارتالارى ازىرلەنۋ ۇستىندە. بىلتىر ءبىرقاتار جول كارتاسىن وزەكتەندىرۋ جۇمىسى جۇرگىزىلدى»، - دەدى ءزۇلفيا سۇلەيمەنوۆا.