اقىلدى ساعات ينفاركت پەن ينسۋلت بەلگىلەرىن ۋاقىتىلى انىقتاۋعا كومەكتەسەدى.
قۇرىلعى جاعدايى اۋىرلاعان ناۋقاستىڭ جاقىندارىنا دەرەۋ حابار بەرىپ، وزدىگىنەن جەدەل جاردەم شاقىرا الادى. تارازدىق دۋلات يسابەك پەن اديا تۇرسىنباي وبلىستىق دارىندى بالالارعا ارنالعان مامانداندىرىلعان ليسەيدە وقيدى.
ولار «ەكىنشى جۇرەك» دەپ اتالاتىن سمارت ساعاتىن 3 اي ىشىندە جاساپ شىققان. قولعا تاعىلاتىن قۇرىلعى جۇرەك سوعىسىن، قانداعى وتتەگى كوەففيسەنتى مەن دەنە تەمپەراتۋراسىن كورسەتەدى. جاس ونەرتاپقىشتار اقىلدى ساعاتتىڭ ءوز قوسىمشاسىن دا جاساپ شىققان. وندا جاساندى ينتەللەكت جۇمىس ىستەيدى. ۇيالى قوسىمشادا دارىگەردىڭ بەكىتكەن ءدارى ءىشۋ كەستەسى دە ەنگىزىلگەن. جاس عالىمدار ەندى سمارت ساعاتتى قالالىق ەمحانالاردىڭ بىرىندە ءىس جۇزىندە سىناپ كورمەك.
ونەرتاپقىشتار ىڭعايلىلىق ءۇشىن قۇرىلعىنىڭ كولەمىن كىشىرەيتىپ، ودان ءارى جەتىلدىرمەك. الداعى ۋاقىتتا قان قىسىمىن ولشەيتىن قوندىرعى قوسۋ جوسپارلارىندا بار.