ەكىباستۇزدا سوت پسيحونيەۆرولوگيالىق ديسپانسەردە 30 جىلدان اسا ۋاقىت ەسەپتە تۇرعان جەرگىلىكتى تۇرعىنعا قاتىستى قىلمىستىق ءىستى قارادى، - دەپ حابارلايدى aqshamnews.kz ءتىلشىسى.
IRBIS TV مالىمەتىنشە، وقيعا 2025 جىلعى قىركۇيەكتە بولعان. ءىس ماتەريالدارىنا ساي، ايەل جۇمىستان ۇيىنە كەلگەن سوڭ ەرلى-زايىپتى اراسىندا قىزعانىشتان جانجال شىققان. ماس كۇيدەگى ەر ادام قولىنا شاينەك الىپ، ايەلىنىڭ باسىنان ەكى رەت ۇرعان. جابىرلەنۋشى ەسىنەن تانىپ، باس-مي جاراقاتىمەن اۋرۋحاناعا جەتكىزىلگەن.
وقيعا بويىنشا قىلمىستىق ءىس قوزعالعانىمەن، سوت تالقىلاۋى ۇزاققا سوزىلماعان. ەكىباستۇز قالالىق سوتى ەر ادامدى اقىل-ەسى كەم دەپ تانىپ، وعان مەديسينالىق سيپاتتاعى ماجبۇرلەۋ شارالارىن قولدانۋ تۋرالى قاۋلى شىعارعان.
"جالپى تيپتەگى پسيحياتريالىق ستاسيوناردا ءماجبۇرلى ەم تاعايىندالسىن"، - دەلىنگەن سوت شەشىمىندە.
ەرلى-زايىپتىنىڭ نەكەدە تۇرعانىنا 35 جىلدان اسقانى بەلگىلى. سوتتا جابىرلەنۋشى كۇيەۋىن ءومىر بويىنا ەمدەۋگە جىبەرۋدى تالاپ ەتەتىنىن مالىمدەگەن. بۇل ۇستانىمدى ولاردىڭ قىزى دا قولداعان، ول - ەر ادامنىڭ رەسمي قامقورشىسى. قىزىنىڭ ايتۋىنشا، اكەسى اناسىنا ۇنەمى كۇش كورسەتىپ وتىرعان.