ەكى مىڭعا جۋىق ەتنيكالىق قازاق قانداس مارتەبەسىن الدى

جالپى، ەلگە ەكى ميلليونعا جۋىق قازاق ورالعان.

قازاقستان ۇكىمەتى جىل باسىنان بەرۋ قانشا ەتنيكالىق قازاققا قانداس مارتەبەسىن بەرگەنىن ايتتى، دەپ حابارلايدى Almaty-akshamy.kz.

«2022 جىلدىڭ 1 ناۋرىز جاعدايى بويىنشا 1 863 ەتنيكالىق قازاقتار تاريحي وتانىمەن تابىسىپ، قانداس مارتەبەسىن الدى. جالپى، 1991 جىلدان بەرى رەسپۋبليكاعا 1 ميلليون 89،7 مىڭ ەتنيكالىق قازاق ورالدى»،- دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.

جىل باسىنان قازاقستانعا كەلگەن قانداستاردىڭ جارتىسىنان كوبى (68،2%) وزبەكستاننان، 14% – قىتايدان، 6،3% – تۇرىكمەنستاننان، 2،3% – موڭعوليادان جانە 9،5% باسقا ەلدەردەن.

كەلگەن ەتنيكالىق قازاقتار نەگىزىنەن الماتى (31،6%)، ماڭعىستاۋ (14،8%)، تۇركىستان (12،4%) جانە جامبىل (6،3%) وبلىستارىنا، سونداي-اق الماتى (7،1%)، نۋر-سۋلتان (6،3%) جانە شىمكەنت (7،9%) قالالارىنا قونىستاندى.

اعىمداعى جىلعى 1 ناۋرىزداعى جاعداي بويىنشا، ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 62،3%-دى، ەڭبەككە قابىلەتتى جاستان كىشىلەر 22،7%-دى جانە زەينەتكەرلەر 15%-دى قۇرايدى.

ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 11%-ى جوعارى ءبىلىمدى، 38،9%-ى ورتا كاسىبي ءبىلىمدى، 48،5%-ى جالپى ورتا ءبىلىمدى جانە 1،5%-ىنىڭ ءبىلىمى جوق.