مۇندا ءوتىنىش بەرۋشى تۋرالى بارلىق دەرەك مەملەكەتتىك ورگانداردىڭ دەرەكقورىنان اۆتوماتتى تۇردە الىنادى.
EGov.kz پورتالى مەن eGov Mobile ءموبيلدى قوسىمشاسىندا مۇمكىندىگى شەكتەۋلى جاندارعا الەۋمەتتىك تولەمدەر تاعايىنداۋ بويىنشا جاڭا قىزمەت ءتۇرى ىسكە قوسىلدى، دەپ حابارلايدى Almaty-akshamy.kz «ۇلتتىق اقپاراتتىق تەحنولوگيالار» اق قوعاممەن بايلانىس باسقارماسىنا سىلتەمە جاساپ.
اقپاراتقا سايكەس، بۇل قىزمەت ءتۇرىنىڭ ەرەكشەلىگى قىزمەتتى ونلاين العان كەزدە ءوتىنىش بەرۋشى تۋرالى بارلىق دەرەك مەملەكەتتىك ورگانداردىڭ دەرەكقورىنان اۆتوماتتى تۇردە الىنادى. ەگەر دەرەكتەر دۇرىس ەنگىزىلسە، وندا ءوتىنىش بەرۋشىنى راستايتىن اقپارات ەكرانعا شىعادى.
مامانداردىڭ ايتۋىنشا، وسى ۋاقىتقا دەيىن مۇنداي قىزمەت ءتۇرى حالىققا قىزمەت كورسەتۋ ورتالىقتارىندا جانە مەديسينالىق-الەۋمەتتىك ساراپتاما بولىمشەلەرىندە قاعاز تۇرىندە كورسەتىلىپ، كوپ ۋاقىت العان كورىنەدى.
«ۇلتتىق اقپاراتتىق تەحنولوگيالار» اق كومانداسى مۇمكىندىگى شەكتەۋلى جاندار ءۇشىن قاجەتتى جانە سۇرانىسقا يە مەملەكەتتىك قىزمەتتەردى سيفرلاندىرۋ بويىنشا جۇمىستى جالعاستىرۋدا. بۇرىن ەڭبەككە جارامسىزدىق بويىنشا تولەمدەردى الۋ ءۇشىن انىقتامالاردى قاعاز تۇرىندە ۇسىنۋ كەرەك بولاتىن، ءقازىر قىزمەتتى الۋ پروسەسى جەڭىلدەتىلدى، پايدالانۋشىعا ءوز دەرەكتەرىنىڭ دۇرىستىعىن تەكسەرىپ، قىزمەتكە قول قويۋ جەتكىلىكتى. بارلىق قاجەتتى اقپارات مەملەكەتتىك ورگانداردىڭ دەرەكقورىنان اۆتوماتتى تۇردە تارتىلادى»، - دەدى كومپانيانىڭ باسقارما ءتوراعاسى روستيسلاۆ كونياشكين.
eGov.kz پورتالى «ەڭبەككە قابىلەتتىلىگىنەن ايىرىلۋ جاعدايىنا الەۋمەتتىك تولەم تاعايىنداۋ» قىزمەتىن الۋ ءۇشىن:
- eGov.kz پورتالىندا اۆتوريزاسيادان ءوتۋ كەرەك؛
- باستى بەتتە «ازاماتتارعا» - «الەۋمەتتىك قامتاماسىز ەتۋ» - "مۇگەدەك ادامداردى قولداۋ» ءوتۋ قاجەت؛
- «ەڭبەككە قابىلەتتىلىگىنەن ايىرىلۋ جاعدايىنا الەۋمەتتىك تولەم تاعايىنداۋ» قىزمەتىن تاڭداۋ كەرەك؛
- ونلاين قىزمەتكە تاپسىرىس بەرۋ كەرەك؛
- ەسق كومەگىمەن قىزمەتكە قول قويىپ، قىزمەتتى ونلاين الۋعا بولادى.
قىزمەت كورسەتۋ مەرزىمى – 8 جۇمىس كۇنى.
جەكە كابينەتتە («قىزمەتتەردى الۋ تاريحى» بولىمىندە) ەلەكتروندىق قۇجات پەن سۇراۋ سالۋدىڭ ناتيجەسى تۋرالى حابارلامامەن تانىسۋ قاجەت.
ال، eGov mobile ءموبيلدى قوسىمشاسىندا بۇل قىزمەت ءتۇرى «جەڭىلدىكتەر، جاردەماقىلار جانە زەينەتاقىلار» بولىمىندە قولجەتىمدى.