پرەمەر-مينيستردىڭ ورىنباسارى التاي كولگىنوۆتىڭ توراعالىعىمەن وتكەن كەڭەستە دەنساۋلىق ساقتاۋ سالاسىن سيفرلاندىرۋ ماسەلەلەرى تالقىلاندى.
دەنساۋلىق ساقتاۋ سالاسىن سيفرلاندىرۋ مەديسينالىق كومەكتىڭ قولجەتىمدىلىگىن ارتتىرۋعا جانە دارىگەرلەردىڭ جۇمىسىن جەڭىلدەتۋگە باعىتتالعان. وسىعان بايلانىستى ەلىمىزدە سيفرلاندىرۋدى تەرەڭدەتۋ جانە دەنساۋلىق ساقتاۋ سالاسىنداعى اقپارات جۇيەلەرىن بىرىكتىرۋ بويىنشا جۇيەلى جۇمىس جۇرگىزىلىپ جاتىر. بۇل ورايدا جەكە مەديسينالىق دەرەكتەردىڭ تارالۋ ءقاۋپىن جويۋ وتە ماڭىزدى سانالادى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.
بۇگىنگى تاڭدا پيلوتتىق رەجيمدە «eGov mobile» ءموبيلدى قوسىمشاسىندا «eDensaulyq» جاڭا ءبولىمى ىسكە قوسىلىپ جاتىر، وندا حالىقتىڭ كەڭەيتىلگەن مەديسينالىق دەرەكتەرى، ونىڭ ىشىندە دونورلىق مارتەبەسى (ءتىرى كەزىندەگى)، ەلەكتروندى رەسەپتىلەر، مەديسينالىق قارسى كورسەتىلىمدەر تۋرالى مالىمەتتەر، جۇكتىلىك بويىنشا ەسەپكە تۇرۋ، ديسپانسەرلىك ەسەپكە تۇرۋ، اۋرۋحاناعا جاتقىزۋ دەرەكتەرى، ۆاكسينالاۋ تۋرالى اقپارات، زەرتحانالىق زەرتتەۋلەر ناتيجەلەرى تۋرالى مالىمەتتەر، كورسەتىلگەن كلينيكالىق-دياگنوستيكالىق قىزمەتتەر (دارىگەردىڭ قابىلداۋى جانە ت.ب.)، اۋرۋحانا پاراقتارى كىرەدى.
ايتا كەتۋ كەرەك، قوسىمشانىڭ ءبىر بولىمىندە اتالعان دەرەكتەردىڭ جينالۋى مەديسينالىق كومەك كورسەتۋدىڭ اشىقتىعىن قامتاماسىز ەتەدى. ەل تۇرعىندارى كەز كەلگەن ۋاقىتتا وزدەرىنىڭ مەديسينالىق دەرەكتەرىنە قاتىستى قاجەتتى اقپاراتتى الا الادى.
«مەديسينالىق كومەكتى ودان دا قولجەتىمدى ەتۋ، ۇيدەن شىقپاي الۋعا بولاتىن قىزمەتتەر ءتىزىمىن ۇلعايتىپ، ولاردىڭ ساپاسىن ارتتىرۋ ءۇشىن دەنساۋلىق ساقتاۋ سالاسىن سيفرلاندىرۋ پروسەستەرىن جانداندىرۋ جانە تەرەڭدەتۋ قاجەت»، - دەدى ا. كولگىنوۆ.
كەڭەس قورىتىندىسى بويىنشا جەرگىلىكتى اتقارۋشى ورگاندارعا قۇپيا مەديسينالىق دەرەكتەردى قورعاۋ كەرەكتىگىن ەسكەرە وتىرىپ، اقپارات جۇيەلەرىن بىرىكتىرۋ جانە سيفرلىق مەديسينانى ودان ءارى دامىتۋ جونىندەگى جۇمىستى كۇشەيتۋ تاپسىرىلدى.