الماتىدا دوستىق ءۇيى عيماراتىنىڭ ءماجىلىس زالىندا قازاقستان رەسپۋبليكاسىنىڭ رەسپۋبليكا كۇنىن مەرەكەلەۋ شەڭبەرىندە «ەلىمنىڭ ەركىندىگى – مەنىڭ ماقتانىشىم» تاقىرىبىندا كونفەرەنسيا ءوتتى.
ءىس-شاراعا بەلگىلى مەملەكەت جانە قوعام قايراتكەرلەرى، تاريحشىلار، ساراپشىلار، ۇكىمەتتىك ەمەس ۇيىمداردىڭ وكىلدەرى جانە قالا جاستارى قاتىستى، دەپ حابارلايدى aqshamnews.kz.
ءىس-شارانىڭ باستى ماقساتى – وتانسۇيگىشتىك سەزىمىن تاربيەلەۋ، ۇلتتىق سانانى نىعايتۋ، ەلدىڭ ساياسي، ەكونوميكالىق، الەۋمەتتىك جانە مادەني سالالارداعى جەتىستىكتەرىن تالقىلاۋ.
رەسپۋبليكا كۇنى مەرەكەسى قازاقستان تاريحىنداعى ماڭىزدى ءسات — 1990 جىلى مەملەكەتتىك ەگەمەندىك تۋرالى دەكلاراسيانىڭ قابىلدانۋىن، ودان كەيىن بۇل 1991 جىلى تولىق تاۋەلسىزدىككە قول جەتكىزۋدىڭ العاشقى قادامداردىڭ ءبىرى.
«قازاق ەلى ەگەمەندىككە وڭاي جەتكەن جوقپىز. وسى جولدا تالاي تاعدىرلى كەزەڭدەر بار. ەگەمەندىكتى ۇستاپ تۇرۋدا وڭاي شارۋا ەمەس. سوندىقتان ءار ادام ەل دامۋى ءۇشىن ءوز ۇلەسىن تيگىزسە، ەل وركەندەيدى. دەربەستىگىمىز ماڭگى بولسىن»، – دەدى قازاقستان جازۋشىلار وداعىنىڭ مۇشەسى، كورنەكتى قالامگەر سماعۇل ەلۋباي.
جيىندا سونىمەن قاتار ءىس-شارانىڭ تۇپكى ءمانى مەن ماعىناسى حاقىندا ىلكىمدى وي-پىكىرلەر ايتىلدى.
«ءبىز ءوز تاۋەلسىزدىگىمىزدى قورعاۋعا، تۇعىرىن بيىك ەتىپ ۇستاپ تۇرۋعا ءتيىسپىز. جاستاردىڭ پاتريوتتىق سەزىمى ارتا بەرسىن. اسكەرىمىز قۋاتتى، رۋحىمىز بيىك بولسىن، حالقىمىز بەيبىت كۇن كەشە بەرگەي»، – دەدى گەنەرال-لەيتەنانت بەكسۇلتان سارسەكوۆ.