ەرجان باباقۇماروۆ دۋالدى وقىتۋدى ەنگىزۋ بويىنشا جۇمىستى كۇشەيتۋدى تاپسىردى
ەرجان باباقۇماروۆ سۇرانىسقا يە ماماندىقتار بويىنشا بىلىكتى كادرلار دايارلاۋ ءۇشىن كوللەدجدەردىڭ جابدىقتالۋىمەن تانىستى، دەپ حابارلايدى Almaty-akshamy.kz.
الماتى قالاسى اكىمىنىڭ ورىنباسارى ەرجان باباقۇماروۆ ءبىلىم باسقارماسىنىڭ باسشىسى ءلاززات جىلقىبايەۆامەن بىرگە ەنەرگەتيكا جانە ەلەكتروندىق تەحنولوگيالار كوللەدجى مەن كوپسالالى كوللەدجىنە بارىپ، قالاداعى «جاس مامان» جوباسىنىڭ ىسكە اسىرىلۋ بارىسىمەن تانىسىپ، ماتەريالدىق-تەحنيكالىق جاراقتاندىرىلۋىن كوردى.
«جاس مامان» جوباسى قازىرگى زامانعى جابدىقتارمەن جاراقتاندىرۋ ارقىلى كوللەدجدەردى جاڭعىرتۋعا باعىتتالعان، ول جاس مامانداردىڭ نەعۇرلىم سۇرانىسقا يە كاسىپتەر بويىنشا داعدىلارىن قالىپتاستىرۋعا باعىتتالعان. الماتىدا وقۋ-ماتەريالدىق بازانى نىعايتۋدا مەملەكەتتىك قولداۋ شارالارىمەن جوبا شەڭبەرىندە 18 كوللەدج قامتىلدى، وعان جوعارى تەحنولوگيالىق يننوۆاسيالىق جابدىقتار، تەحنيكا مەن كومپيۋتەرلەر ساتىپ الىندى. ماسەلەن، 2021-2022 جىلدارى وسى جوبا شەڭبەرىندە كادرلار دايارلاۋعا مەملەكەتتىك تاپسىرىس 11 405 ورىنعا، ونىڭ ىشىندە «ەڭبەك» باعدارلاماسى بويىنشا 2500 ورىنعا 48 كوللەدجدە ورنالاستىرىلدى. وتكەن جىلى 11 219 ورىن ءبولىندى. ايتا كەتسەك، وقىتۋ تەگىن جانە تاڭدالعان ماماندىققا بايلانىستى 2-3 جىلعا سوزىلادى.
ساپار بارىسىندا جوبالاۋ، قۇراستىرۋ، جۇيەلەردى ىسكە قوسۋ جانە قىزمەت كورسەتۋگە دەيىنگى تولىق تىزبەكتى ىسكە اسىرۋ ءۇشىن ينتەراكتيۆتى جابدىقپەن جابدىقتالعان وقۋ-وندىرىستىك شەبەرحانالار، وقۋ ساباقتارىنىڭ اۋديتوريالارى قارالدى. ەنەرگەتيكا جانە ەلەكتروندىق تەحنولوگيالار كوللەدجىندە اكىم ورىنباسارى جاڭارتىلاتىن ەنەرگيا كوزدەرى، ەلەكتر جابدىقتارى سالاسىنداعى زەرتحانالاردا، كۇن پانەلدەرىن قۇراستىرۋ سەحىندا بولدى. سونداي-اق، ءبىلىم الۋشىلاردىڭ سالاۋاتتى ءومىر سالتىن قالىپتاستىرۋعا ارنالعان ورىنداردى دا ارالادى. مىسالى، كوللەدجدە جابدىقتالعان سپورت كەشەنى بار: ۆولەيبول، باسكەتبول الاڭدارى، فۋتبول الاڭى، تەننيس زالى، بوكس زالى، workout ايماعى.
قالا اكىمىنىڭ ورىنباسارى ەرجان باباقۇماروۆ وقۋ ۋاقىتىنىڭ 40%-نا دەيىن وقۋشىلار كاسىپورىنداردا وتكىزەتىن دۋالدى وقىتۋدىڭ جاڭا زەرتحانالارى مەن وندىرىستىك سىنىپتارىنىڭ بازاسىندا دامىتۋ بويىنشا مىندەتتەردى بەلگىلەدى. وسى ماقساتتا بيزنەس-قوعامداستىقپەن ىنتىماقتاستىق بويىنشا جۇمىستى كۇشەيتۋ، ونىڭ ىشىندە تۇلەكتەردى ودان ءارى جۇمىسقا ورنالاستىرۋدى قامتاماسىز ەتۋ تاپسىرىلدى. كوللەدجدەردى جاڭعىرتۋ جانە رەسپۋبليكالىق جانە حالىقارالىق دەڭگەيلەردە تالاپ ەتىلەتىن بىلىكتى مامانداردى دايارلاۋدىڭ حالىقارالىق تاجىريبەسىن ەنگىزۋ، جەكەلەگەن ماماندىقتار بويىنشا قۇزىرەتتىلىك ورتالىقتارىن ۇيىمداستىرۋ، سونداي-اق WorldSkills چەمپيوناتتارىنا قاتىسۋشىلاردى دايىنداۋ بويىنشا ءبىرقاتار تاپسىرما بەرىلدى.