ادىستەمەلىك قۇرالدىڭ اۆتورلارى – الماتى قالاسىنداعى №122 ورتا مەكتەبىنىڭ تاريح ءپانىنىڭ مۇعالىمدەرى داۋلەت ەسەنوۆ پەن اياۋلىم تىلەپبەرگەنوۆا.
جاس ۇستازداردىڭ اۆتورلىعىمەن جارىق كورگەن «دۇنيەجۇزى تاريحى» پانىنەن 5-11 سىنىپ وقۋشىلارىنا ارنالعان وقۋ-ادىستەمەلىك قۇرال مۇعالىمدەر مەن وقۋشىلارعا ۇبت-عا دايىندىققا ارنالعاندىعىمەن ەرەكشەلەنەدى، دەپ حابارلايدى Almaty-akshamy.kz
بۇل تۋرالى رەداكسيامىزعا حابارلاعان الماتى قالاسىنداعى №13 مەكتەپ-گيمنازياسىنىڭ تاريح ءپانىنىڭ ءمۇعالىمى سايدناسيموۆ قايراتتىڭ ايتۋىنشا، وقۋ قۇرالىندا تاريحي وقيعالار مەن ونىڭ مازمۇنىنا باعا بەرۋگە نەگىزدەلگەن، وقۋشىلاردىڭ تانىمدىق قابىلەتتەرىن ارتتىراتىن تەستتىك سۇراقتار كەڭىنەن قاراستىرىلعان.
وقۋشىلاردىڭ ءبىلىمىن جەتىلدىرۋدە حرونولوگيالىق داتالار مەن تەرميندەر، تاريحي گەوگرافيالىق اتاۋلار دا قامتىلعان. ءار تاقىرىپ مازمۇنى بويىنشا ۇبت كونتەكستەرى جازىلعان. تاقىرىپتى تولىق مەڭگەرۋگە، ماڭىزدى وقيعالاردى نۇسقاۋمەن ىزدەستىرە وتىرىپ، وقيعانىڭ ناقتى جاۋابىن تابۋعا باعىتتالعان ديداكتيكالىق وقۋ قۇرالىنىڭ تاعى ءبىر ەرەكشەلىگى وقۋشى – ءار تاقىرىپشادان كەيىن QR-كودتىڭ كومەگىمەن intellectx.kz سايتىنا كىرۋ ارقىلى اشىق جانە جابىق تاپسىرمالاردى ورىنداپ، تاقىرىپتى قانشالىقتى مەڭگەرگەنىن تەكسەرە الادى. پەداگوگيكاداعى ەلدىك مۇددە جولىندا جازىلعان قاجىرلى ەڭبەك قاشان دا ەل يگىلىگىنە قىزمەت ەتەدى.
«ۋاقىتتىڭ تالابىنا ساي جاڭارتىلعان ءبىلىم بەرۋ باعدارلاماسى بويىنشا جازىلعان كومەكشى وقۋ قۇرالىن ازىرلەگەن اۆتورلارعا الماتى قالاسىنىڭ تاريحشىلارى ۇلكەن ريزاشىلىقتارىن بىلدىرۋدە.ءبىز ءوز تاراپىمىزدان اۆتورلارعا راحمەت ايتىپ، الداعى ۋاقىتتا دا ءبىزدى ءوز ەڭبەكتەرىمەن قۋانتا بەرۋىنە تىلەكتەسپىز. وقۋشىلاردىڭ ماقساتىنا جەتۋىنە كومەكتەسۋ جولىنداعى يگىلىكتى ءىستىڭ قۋانىشى ۇزاعىنان ءسۇيىندىرسىن»، - دەدى تاريحشى-ۇستاز سايدناسيموۆ قايرات.