2022 جىلدىڭ 4 قازانىندا اۆستراليانىڭ مەلبۋرن قالاسىندا «بورتە - الەم حانشاسى» سپەكتاكلىنىڭ تۇساۋى كەسىلمەك.
ساحنالىق قويىلىم كوزى تىرىسىندە اڭىز ادامعا اينالعان وتاندىق جازۋشى، دراماتۋرگ دۋلات يسابەكوۆتىڭ تانىمال پەساسىنىڭ نەگىزىندە قۇرىلعان. ءقازىر دايىندىق جۇمىستارى قىزا ءتۇستى. باستى ءرولدى سومدايتىن اكتريسانى تاڭداۋعا ەرەكشە ءمان بەرىلگەن، دەپ حابارلايدى Almaty-akshamy.kz.
«ەۋروپالىق دراماتۋرگتەر ءوز شىعارمالارىندا ونداعان جىلدار بويى تەك ەر ادامداردى باس كەيىپكەر ەتۋدى ادەتكە اينالدىرعان. ايەل وبرازى جوقتىڭ قاسى دەۋگە بولادى. ولار ءۇشىن بورتە - سەنساسيا، تىڭ جاڭالىق. شىڭعىسحاندى جاقسى بىلەدى. بورتە جايىندا بىلەتىنى از عانا. سوندىقتان ولار پەسسانى جاي عانا "بورتە" ەمەس، "بورتە - الەم يمپەراتريساسى" دەپ اتادى. مەن بۇل اتاۋدى قۋانا قابىلدادىم»، - دەيدى جازۋشى دۋلات يسابەكوۆ.
دۋلات يسابەكوۆ پرەمەراعا ءوزىنىڭ قاتىسۋى ەكىتالاي ەكەنىن ايتادى. بورتە بەينەسىن سومدايتىن شەتەل اكتەرلەرىنىڭ ويىنىن بالالارى باعالاپ قايتادى. بۇل - الداعى جوسپار. ەرتەڭگى كۇنى الماتىدا جازۋشىنىڭ شىعارماشىلىعىنا ارنالعان باسپا ءسوز ءماسليحاتى وتەدى. وندا دۋلات يسابەكوۆتىڭ جاقىندا شۆەد تىلىنە اۋدارىلعان شىعارمالارىنىڭ جيناعى كوپشىلىككە تانىستىرىلادى.
«بەس پەسا مەن ءۇش اڭگىمە. ولاردى شۆەد اكادەمياسىنىڭ مۇشەسى، نوبەل سىيلىعىنىڭ لاۋرەاتى بەنگت سامۋەلسون اۋداردى»، - دەيدى جازۋشى دۋلات يسابەكوۆ.
جازۋشى شىعارماشىلىعى شەتەل وقىرمانىن نەسىمەن قىزىقتىرىپ، قالاي باۋراپ العانىن ءوزى دە بىلمەيدى. «تابىس كىلتىنىڭ سىرى نەدە ەكەنىن دە ايتۋ قيىن» دەيدى. ۇلىلىق قاراپايىمدىلىقتا ەكەنى بارشاعا ءمالىم. ەندى ءبىر «ترانزيتتىك جولاۋشى» قويىلىمىن الەمدىك تەاترلار ساحنالاۋعا اسىق. بۇل تۋىندى الدىمەن سانكت-پەتەربۋرگتە، كەيىن لوندوندا ونەرسۇيەر قاۋىمنىڭ ايىزىن قاندىرعان ەدى. ءدال وسى قويىلىم الەم ساحنالارىنداعى وتاندىق جازۋشىنىڭ تىڭ ەڭبەكتەرىنىڭ شەرۋىنە باستاۋى بولدى. ەندىگى كەزەكتە - مەلبۋرن. كۇزدە اۆستراليالىق كورەرمەن تاريحي تۇلعا بورتەنىڭ بەينەسىن بارىنشا تانيتىن بولادى.