«بورتە» سپەكتاكلى حالىقارالىق دەڭگەيدە تانىلىپ وتىر
بەلگىلى جازۋشى، دراماتۋرگ، قازاقستاننىڭ ەڭبەك ەرى دۋلات يسابەكوۆتىڭ «بورتەسى» جاقىن ارادا اقش تەاترلارىندا قويىلادى. بۇل تۋرالى قالامگەردىڭ تۇركىستان قالاسىندا اتاپ وتىلگەن مەرەيتويىندا بەلگىلى بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سالتاناتتى شارادا ءوڭىر جۇرتشىلىعى مەن وقىرمان قاۋىم قالامگەرگە قۇرمەت كورسەتىپ، شىعارماشىلىعىن جوعارى باعالادى. مەرەيتوي بارىسىندا د.يسابەكوۆتىڭ ءومىرى مەن شىعارماشىلىعىنا ارنالعان كىتاپ كورمەسى ۇيىمداستىرىلدى.
جيىن تۇركىستان مۋزىكالىق دراما تەاترىندا جازۋشىنىڭ «بورتە» سپەكتاكلىمەن جالعاسىن تاپتى.
وبلىس اكىمى دارحان ساتىبالدى دۋلات يسابەكوۆتى قۇتتىقتاۋ سوزىندە، ونىڭ ادەبيەتتە عانا ەمەس، پۋبليسيستيكا، درامماتۋرگيا سالالارىندا دا ءوز جولىن قالىپتاستىرعانىن جەتكىزدى.
«تۋعان جەرىڭىز – قاسيەتتى تۇركىستان وڭىرىنە كەلىپ، مەرەيتويىڭىزدى جالعاستىرۋ – ءبىز ءۇشىن ۇلكەن مارتەبە. جۋىردا مەملەكەت باسشىسى قاسىم-جومارت توقايەۆ تۇركىستانعا رۋحاني جانە تاريحي استانا مارتەبەسىن بەرۋدى ۇسىندى. وسى باعىتتا جۇمىس ءجۇرىپ جاتىر. تۇركىستان – قازاق حاندىعىنىڭ استاناسى بولعان ۇلى شاھار. تاريحي شەشىمدەر وسى قالادا قابىلدانعان. ءبىزدىڭ تۇركىستاندى دامىتۋداعى باستى ماقساتىمىز – ءوڭىردى تۇركى الەمىنىڭ رۋحاني-مادەني ورتالىعىنا اينالدىرۋ. بۇل ماقساتتى جۇزەگە اسىرۋدا وزىڭىزدەي قالامگەرلەردىڭ، وسىنداي ءىس-شارالاردىڭ قوسار ۇلەسى مول»، – دەدى وبلىس اكىمى
دۋلات يسابەكوۆ كورەرمەندەر مەن ايماق تۇرعىندارىنا ريزاشىلىعىن ءبىلدىرىپ، العىسىن ايتتى.
«شەتەلدەردەگى ادەبي جيىنداردا، قويىلىمدارىمنىڭ پرەمەرالارىندا قازاق ادەبيەتى، تاريحى، مادەنيەتى تۋرالى وي قوزعاپ جۇرەمىن. بۇگىندە «بورتە» سپەكتاكلى حالىقارالىق دەڭگەيدە تانىلىپ وتىر»، – دەدى جازۋشى.
تاريحي تۋىندىنى تاماشالاۋعا تەك تۇركىستان وبلىسى عانا ەمەس، وزگە وڭىرلەردەن دە كورەرمەندەر ارنايى كەلگەن ەكەن. الداعى ۋاقىتتا «بورتە» اقش مەملەكەتىنىڭ تەاترلارىندا دا ۇسىنىلادى دەپ جوسپارلانىپ وتىر.