جاڭا مۇمكىندىكتەر
Dubai EXPO-2020 جاھاندىق يدەيالار الاڭىنا اينالىپ جاتىر، دەپ حابارلايدى Almaty-akshamy.kz. Qazaqtv.com سايتىنا سىلتەمە جاساپ.
دۋبايداعى ەكسپو كورمەسىندەگى قازاقستان پاۆيلونى كەلۋشىلەردى روبوت پەن ادامنىڭ ورىنداۋىنداعى بيمەن قارسى الادى.
بۇل – تەحنولوگيا مەن ادامنىڭ ءبىر-بىرىن تولىقتىرىپ تۇراتىن جاڭا زامان كورىنىسى. ەكەۋى دە عالامشارعا زيانىن تيگىزبەۋى كەرەك. كەرىسىنشە، مۇمكىندىكتەرىن بىرىكتىرە وتىرىپ، قورشاعان ورتانى ساقتاپ قالا الادى.
ءبيشى ماريا ۆولودارەس زالدا وتىرعانداردىڭ ءارقايسىسىنا عالامشاردىڭ تازالىعىنا ءار جان جاۋاپتى دەگەندى بي تىلىمەن جەتكىزەدى.
«ءبىز وسىدان 10 جىل بۇرىن نە بولاتىنىن ەلەستەتە المادىق. سول سياقتى 100 جىلدان كەيىن ادامدار جاساندى اقىلمەن جۇمىس ىستەۋى مۇمكىن. بۇل قانداي دا ءبىر سيقىر دەپ ويلاماۋ كەرەك. ءبارى دە مۇمكىن»، - دەدى ءبيشى ماريا ۆولودارەس.
پاۆيلونعا كىرگەن ءار ادام قازاق دالاسىنىڭ سالقىن سامالىن سەزىنەدى. بۇل دۋبايدىڭ 40 گرادۋس شىجىعان اپتابىندا ەرەكشە اسەر سىيلارى انىق.
ودان كەيىن جۋسان ءيىسىن جۇتىپ، قازاقتىڭ قارا دومبىراسىنىڭ قوڭىر ءۇنىن تىڭداپ، شىنىمەن شەكسىز دالادا جۇرگەندەي سەزىنەدى. كەلۋشىلەر قازاقستاننىڭ فلوراسى مەن فاۋناسى تۋرالى، عاجاپ تابيعاتى مەن دەمالىس ايماقتارى جايلى اقپارات الا الادى.