بۇگىن، 17 مامىر – بۇكىل الەمدە ارتەريالىق گيپەرتونياعا قارسى كۇرەستىڭ دۇنيەجۇزىلىك كۇنى اتالىپ وتۋدە. بۇل – جۇرەك-قان تامىرلارى اۋرۋلارى مەن مەزگىلسىز ءولىمنىڭ ەڭ ءقاۋىپتى ءارى كەڭ تارالعان ءقاۋىپ فاكتورلارىنىڭ ءبىرى.
دۇنيەجۇزىلىك دەنساۋلىق ساقتاۋ ۇيىمىنىڭ (ددۇ) مالىمەتىنشە، الەم بويىنشا 30-دان 79 جاسقا دەيىنگى 1،28 ميللياردتان استام ادام گيپەرتونيامەن اۋىرادى، سونىمەن قاتار پاسيەنتتەردىڭ شامامەن 46%-ى ءوز دياگنوزدارى تۋرالى بىلمەيدى.
قازاقستاندا اعىمداعى جىلدىڭ ءبىرىنشى توقسانىنىڭ قورىتىندىسى بويىنشا، قاناينالىم جۇيەسى اۋرۋلارى قۇرىلىمىندا ارتەريالىق گيپەرتەنزيا دياگنوزى بار پاسيەنتتەردىڭ ۇلەسى 47،7%-دى قۇرايدى. سىرقاتتانۋشىلىقتىڭ ارتۋى نەگىزىنەن حالىقتى سكرينينگپەن قامتۋدىڭ ۇلعايۋىمەن بايلانىستى.
اۋرۋدىڭ باستاپقى كەزەڭىندە ەشقانداي بەلگىلەر بولمايدى، الايدا مەديسينالىق-سانيتاريالىق العاشقى كومەك ۇيىمدارىندا جۇرگىزىلەتىن قان قىسىمىن ولشەۋ، ەكگ ءتۇسىرۋ جانە زەرتحانالىق تالداۋلاردىڭ ارقاسىندا پاسيەنتتەر دەر كەزىندە ەم قابىلداي باستايدى جانە قاجەت بولعان جاعدايدا ديسپانسەرلىك ەسەپكە الىنادى.
2024 جىلى سكرينينگتەن 1،9 ميلليونعا جۋىق ادام ءوتتى، ناتيجەسىندە 104 مىڭنان استام جاڭا گيپەرتونيا جاعدايى انىقتالىپ، ولار تۇراقتى باقىلاۋعا الىندى.
ەۋروپالىق گيپەرتونيا قوعامىنىڭ ۇسىنىمدارىنا سايكەس:
• ارتەريالىق قىسىمنىڭ نىسانالى دەڭگەيى – 140/90 مم سىن. باع. تومەن بولۋى ءتيىس؛
• ەمدەۋ ءومىر سالتىن وزگەرتۋدى (تۇز تۇتىنۋدى ازايتۋ، تەمەكى مەن الكوگولدەن باس تارتۋ، فيزيكالىق بەلسەندىلىك) جانە قاجەت بولعان جاعدايدا دارى-دارمەكپەن ەمدەۋدى قامتيدى.
دەنساۋلىق ساقتاۋ مينيسترلىگى حالىقتى ارتەريالىق قىسىمىن باقىلاۋعا، پروفيلاكتيكالىق قاراپ-تەكسەرۋلەرىنەن تۇراقتى تۇردە وتۋگە جانە ەمدەۋشى دارىگەردىڭ ۇسىنىمدارىن ورىنداۋعا شاقىرادى.