قىز WhatsApp-تاعى توپقا ءوزىن تاكسي جۇرگىزۋشىسى ۇرلاپ كەتكەنىن جازىپ، دوستارىنان كومەك سۇراعان.
دوستارىمەن ازىلدەسپەك بولعان 19 جاستاعى قىزعا 91 مىڭ تەڭگە ايىپپۇل سالىندى، دەپ حابارلايدى Almaty-akshamy.kz
ەلورداداعى قالالىق پوليسيا دەپارتامەنتى باسپا ءسوز قىزمەتىنىڭ مالىمەتىنشە، تۇنگى ءبىر جارىمدا «102» ارناسىنا ە-565 كوشەسىندە «يندرايۆەر» ارقىلى جولاۋشى تاسيتىن «Toyota Camry» اۆتوكولىگىنىڭ جۇرگىزۋشىسى قىزدى بەلگىسىز باعىتتا الىپ كەتكەنى تۋرالى اقپارات ءتۇستى.
«جاس قىز WhatsApp مەسسەندجەرىندەگى توپقا ءوزىن ۇرلاپ اكەتىپ بارا جاتقانىن ايتىپ، دوستارىنان كومەك سۇراعان. الايدا تەكسەرىس بارىسىندا مۇنداي فاكت راستالعان جوق»، - دەلىنگەن حابارلامادا.
انىقتالعانداي، 19 جاستاعى بويجەتكەن چاتتاعى دوستارىمەن وسىلاي ازىلدەسپەك بولعان.
بۇل فاكتى بويىنشا ەلوردا تۇرعىنى اكىمشىلىك قۇقىقبۇزۋشىلىق تۋرالى كودەكستىڭ 438-بابى «ارنايى قىزمەتتەردى كورىنەۋ جالعان شاقىرۋ» بويىنشا اكىمشىلىك جاۋاپقا تارتىلدى. وعان 30 اەك نەمەسە 91 890 تەڭگە ايىپپۇل سالىندى.