دوپينگ دىڭكەلەتىپ تۇر

ەلىمىزدە تاعى جەتى زىلتەمىرشىنىڭ باسى داۋعا قالدى

2014 جىلدان بەرى 123 سپورتشىمىز دوپينگكە بايلانىستى سپورتتان شەتتەتىلگەن. ونىڭ ىشىندە ەڭ كوبى اۋىر اتلەتيكادا، ياعني 25 جاعداي. ءتىزىمدى جەڭىل اتلەتيكا، ارمرەستلينگ، كۇرەس جانە ۆەلوسپورت جالعايدى، دەپ حابارلايدى اlmaty-akshamy.kz.

بۇعان دەيىن يليا ءيليننىڭ سوڭىنان ءسوز ەرىپ، العان جۇلدەسىن قايتارسا، ەندى نيدجاد راحيموۆ تا سونىڭ كەبىن كيدى.

باسى داۋعا قالعان تاعى 6 زىلتەمىرشىمىز بار. ولار - ابىلاي اۋەلحانوۆ، يۋليا پوتاسوۆا، رۋفينا شالقاروۆا، الەكسەي دروزدوۆ، ماتۆەي ماكرۋشين جانە توكيو وليمپياداسىنىڭ قولا جۇلدەگەرى يگور سون. ۇلتتىق دوپينگكە قارسى ورتالىعىنىڭ تەكسەرىسىنەن كەيىن بارلىعىنىڭ سىناماسى وڭ ناتيجە كورسەتكەن.

– 9 اقپان مەن 2 ناۋرىز ارالىعىندا اۋىر اتلەتيكادان ۇلتتىق قۇراما مۇشەلەرىن جارىستان تىس دوپينگكە قارسى تەكسەرۋ كەزىندە 6 سپورتشىمىزدىڭ سىناماسى وڭ ناتيجە كورسەتتى. ولاردىڭ بارلىعى - الماتى وبلىسىنىڭ وكىلدەرى. دوپينگكە قارسى «نولدىك توزىمدىلىك» ساياساتى نەگىزىندە فەدەراسيا تاراپىنان ىشكى تەرگەۋ جۇمىستارى جۇرگىزىلەدى، - دەدى ق ر اۋىر اتلەتيكا فەدەراسياسىنىڭ سپورتتىق ديرەكتورى رومان تەمىرجانوۆ.

- وسىعان بايلانىستى فەدەراسياداعى جاۋاپتى ادامداردى قىزمەتىنەن بوساتىپ، ورنىنا بىلىكتى مامانداردى الۋ كەرەك، – دەيدى ايدار ماحمەتوۆ. ونىڭ ايتۋىنشا، كەز كەلگەن سپورتشى دوپينگكە قارسى سىنامانى ەكى قۇتىعا ءبولىپ تاپسىرادى. كوبىنە ءبىرىنشى ىدىستا انىقتالعان وڭ جاعدايدان كەيىن، ءوزىنىڭ كىناسىن ىشتەي بىلەتىندەر ەكىنشى قۇتىنى اشتىرۋعا اسىقپايدى. ويتكەنى ودان كەيىن دە تەستىلەۋ قورىتىندىسى وڭ ناتيجەنى كورسەتسە، سپورتتان شەتتەتۋ مەرزىمى 2 ەسە ۇزارادى.