الىپ مەگاپوليستىڭ قوعامدىق ءتارتىبىن قامتاماسىز ەتەتىن 5571 اسكەري بولىمىندە ۇلتتىق دومبىرا كۇنى ساربازدار اراسىندا «كۇي كۇمبىرى» اتتى شاعىن بايقاۋ ۇيىمداستىرىلدى. اتالعان ءىس-شارانىڭ ماقساتى – ۇلتتىق قۇندىلىعىمىزدىڭ مارتەبەسىن كوتەرۋ، ناسيحاتتاۋ.
مەرەكە كۇنى ساربازدار ۇلتتىق اسپابىمىزدىڭ تاريحى جايىندا اڭگىمەلەدى. ارتىنشا ونەرلى ۇلاندىق جاۋىنگەرلەر دومبىرا شاناعىنان بىرىنەن سوڭ ءبىرى كۇمبىرلەتىپ كۇي توكتى. «بالبىراۋىن»، «ەركە سىلقىم»، «سارىارقا»، «اداي» سىندى كەڭىنەن تانىمال كۇيلەر شەرتىلدى.
بۇل جارىستا ماتەريالدىق-تەحنيكالىق قامتاماسىز ەتۋ روتاسىنىڭ ساربازى قاتارداعى جاۋىنگەر دانيل وتت ەرەكشە كوزگە ءتۇستى. شەشەن ۇلتىنىڭ وكىلى بولسا دا، قازاقتىڭ قوڭىر ءۇندى دومبىراسىنىڭ قۇلاعىندا ويناپ، جينالعانداردى ەرەكشە ءتانتى ەتتى. ول اسكەرگە جامبىل وبلىسى، جۋالى اۋدانى، باۋىرجان مومىش ۇلى اۋىلىنان شاقىرىلعان. ازاماتتىق بورىشىن وتەپ جۇرگەنىنە 7 ايدان اسىپتى.
– مەن العاش اسكەرگە كەلگەندە، ەڭ الدىمەن انامنىڭ ءقادىرىن جاقسى ءتۇسىندىم. مەنى وسى ۋاقىتقا دەيىن تاربيەلەپ وسىرگەنى ءۇشىن اناما شەكسىز العىسىمدى بىلدىرەمىن. اناممەن كەزدەسەر كۇندى اسىعا كۇتۋدەمىن. اسكەرگە كەلگەلى الدىمەن ادەپ پەن ءتارتىپتى ۇيرەندىم. موينىما ارتىلعان جاۋاپكەرشىلىكتى جەتە ءتۇسىندىم. اسكەري ءتارتىپ مەنىڭ ازامات رەتىندە تولىق قالىپتاسۋىما مۇمكىندىك بەرىپ جاتىر. العاش اسكەر قاتارىنا قابىلدانعان ءساتىم مەن قازىرگى كەزىمدى سالىستىرمالى تۇردە سارالايتىن بولسام، وزىمنەن ۇلكەن وزگەرىستەر بايقالادى. اسكەري تارتىپكە ۇيرەتىپ، وسى سالادا باعىت-باعدار بەرىپ جۇرگەن كومانديرلەرىمە دە العىسىم شەكسىز. ال دومبىرا شەرتۋدى بالا كۇنىمنەن جاقسى كورەمىن. مەكتەپتە وقىپ جۇرگەندە قاتارلاستىرىممەن ءتۇرلى جارىستارعا قاتىساتىنبىز، قىزىعۋشىلىعىم سودان باستالدى، – دەيدى دانيل.
ءىس-شارا سوڭىندا 5571 اسكەري ءبولىمىنىڭ كومانديرى پولكوۆنيك ماقسات بايماعۇلوۆ ساحنا تورىنە كوتەرىلىپ، بايقاۋعا قاتىسقان، ونەرگە جاقىن ساربازدارعا ريزاشىلىعىن ءبىلدىردى.