1 قاراشادا دوكتورانتۋراعا ءتۇسۋ ەمتيحانىنا قۇجات قابىلداۋ باستالدى
بيىلدان باستاپ دوكتورانتۋراعا تۇسەتىندەر قازاق ءتىلىن مەڭگەرگەنىن راستايتىن سەرتيفيكات ۇسىنۋعا ءتيىس، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
1 قاراشادا دوكتورانتۋراعا ءتۇسۋ ەمتيحانىنا قۇجات قابىلداۋ باستالدى. قۇجات قابىلداۋ 18 قاراشاعا دەيىن جالعاسادى. ءتۇسۋ ەمتيحانى 5-11 جەلتوقسان ارالىعىندا وتەدى.
ق ر عىلىم جانە جوعارى ءبىلىم مينيسترلىگى حابارلاعانداي، ءتۇسۋ ەمتيحانىنا قاتىسۋعا ق ر عجبم ۇلتتىق تەستىلەۋ ورتالىعىنىڭ app.testcenter.kz سايتىندا تىركەلۋگە بولادى.
دوكتورانتۋراعا ءتۇسۋ ءۇشىن تەك ءبىر جوعارى وقۋ ورنى مەن ءبىلىم باعدارلامالارىنىڭ ءبىر توبىن عانا تاڭداۋعا بولادى.
ەگەر تۇسۋشىگە بەرىلگەن وتىنىشكە (تەستىلەۋدى تاپسىرۋ قالاسى، ءبىلىم باعدارلامالارىنىڭ توبى، تەستىلەۋدى تاپسىرۋ ءتىلى) وزگەرىس ەنگىزۋ قاجەت بولعان جاعدايدا، وعان ءوتىنىش قابىلداۋ جۇيەسى جابىلعانعا دەيىن (18 قاراشاعا دەيىن) ءوتىنىشتى وڭدەۋ نەمەسە جويۋ مۇمكىندىگى بەرىلەدى.
تەستىلەۋ ورنى مەن ۋاقىتى تۋرالى اقپارات ءتۇسۋشىنىڭ جەكە كابينەتىندە 29 قاراشادا جاريالانادى.
«ءتۇسۋ ەمتيحانىنا ەسسە جازۋ، دوكتورانتۋراعا دايىندىق تەستى جانە ءبىلىم باعدارلاماسى توبىنىڭ بەيىنى بويىنشا ەمتيحان كىرەدى. جالپى، ءتۇسۋ ەمتيحانىنىڭ ەڭ جوعارى كورسەتكىشى - 100 بالل، ونىڭ ىشىندە اڭگىمەلەسۋ – 20 بالل، ەسسە – 10 بالل، دوكتورانتۋرادا وقۋعا دايىندىعىن انىقتاۋعا ارنالعان تەست – 30 بالل، بەيىنى بويىنشا ەمتيحان سۇراقتارى – 40 بالل. ال مەملەكەتتىك ءبىلىم تاپسىرىسى بويىنشا كونكۋرسقا قاتىسۋ ءۇشىن جانە اقىلى نەگىزدە دوكتورانتۋراعا ءتۇسۋ ءۇشىن شەكتى بالل - 75»، – دەپ اتاپ ءوتتى ق ر عىلىم جانە جوعارى ءبىلىم ۆيسە-مينيسترى قۋانىش ەرعالييەۆ.
سونداي-اق، بيىل العاش رەت دوكتورانتۋراعا ءتۇسۋ ءۇشىن شەت ءتىلىن ءبىلۋ سەرتيفيكاتىنان باسقا، قازتەست جۇيەسى بويىنشا مەملەكەتتىك ءتىلدى مەڭگەرگەنىن راستايتىن سەرتيفيكات ۇسىنۋ قاجەت.
ەرەجەنى بۇزعانى ءۇشىن تەستىلەۋگە جىبەرىلمەگەن، سونداي-اق اعىمداعى جىلى ناتيجەلەرى جويىلعان تۇلعالار دوكتورانتۋراعا ءتۇسۋ ەمتيحانىنا قايتا قاتىسۋعا جىبەرىلمەيتىنىن اتاپ وتكەن ءجون.