بۇگىن الماتىنىڭ ورتالىق ستاديونىندا جىلدىڭ ەڭ اۋقىمدى مۋزىكالىق وقيعالاردىڭ ءبىرى دجەننيفەر لوپەستىڭ Up All Night اتتى الەمدىك تۋرى اياسىنداعى جەكە كونسەرتى ءوتىپ جاتىر. ءانشى بۇل ساپارمەن العاش رەت قازاقستانعا ات باسىن تىرەپ، اۋەلى استانادا ونەر كورسەتتى، ال ەندى تىڭدارمانداردىڭ سۇرانىسىمەن الماتى تورىنە كەلىپ، قالانى جاھاندىق مۋزىكا الەمىنىڭ جارقىراعان ورتالىعىنا اينالدىردى، دەپ حابارلايدى Aqshamnews.kz.
ساحناعا الەمدىك جۇلدىزدى كورۋگە 20 مىڭنان استام كورەرمەن جينالدى. ولاردىڭ اراسىندا 35-تەن استام ەلدەن كەلگەن مەيماندار مەن 8 مىڭنان اسا شەتەلدىك تۋريست بار. كەشتىڭ ءسانى كىرىپ، ساحنادان كۇمبىرلەگەن حيت اۋەندەر توگىلدى؛ كورەرمەندەر بيلەپ، بىرگە شىرقاپ، ەستە قالار ءساتتى تەلەفونعا ءتۇسىرىپ الەك.
تاڭنان بەرى ستاديون اۋماعى مەرەكەلىك كوڭىل-كۇيگە بولەندى. الماتى تۇرعىندارى مەن قوناقتارىن ارلى-بەرلى وتكەن كوشە ارتىستەرى مەن كوڭىلدى ماسكوتتار قارسى الىپ، مەرەكەنىڭ العاشقى شۋاعىن شاشتى. قالا قىزمەتكەرلەرى مەن ەرىكتىلەر ءتارتىپ پەن تازالىقتى قاتاڭ قاداعالاپ، قوقىس جينالۋىنا جول بەرمەدى. سول سەبەپتى بۇل كەشتە تەك ساحنا شامدارى عانا ەمەس، شاھاردىڭ ءوزى دە جارقىراپ تۇردى.
كورەرمەندەردى كونسەرتكە كىرگىزۋ ساعات 15:00-دە باستالدى. ارەناعا ءۇش كىرەبەرىس ارقىلى — اباي داڭعىلى، ساتبايەۆ جانە بايتۇرسىنوۆ كوشەلەرى جاعىنان كىرۋگە مۇمكىندىك بەرىلدى. اسىرەسە، ساتبايەۆ كوشەسى جاعىندا ادام ءنوپىرى كوبەيگەن ساتتە كىشىگىرىم توپتاسۋ بايقالدى.
ۇيىمداستىرۋشىلار، جەكە كۇزەت، ەرىكتىلەر مەن پوليسيا قىزمەتكەرلەرى كورەرمەن اعىنىن رەتتەپ، ءتارتىپ پەن قاۋىپسىزدىكتى قامتاماسىز ەتتى. بارلىق قوناق ءوز ورنىنا دەر كەزىندە جايعاسىپ، كونسەرت ۋاقىتىلى باستالدى.
بارلىق قىزمەتتڭ ۇيلەسىمدى جۇمىسى، ءاربىر ۇساق-تۇيەككە ءمان بەرۋى جانە ۇيىمداستىرۋشىلار مەن قالالىق قىزمەتتەردىڭ بىرلەسكەن ەڭبەگى كونسەرتتىڭ ءمىنسىز ءوتۋىن قامتاماسىز ەتتى. بۇل كەش كورەرمەندەرگە مۋزىكالىق اسەر عانا ەمەس، الماتىدا وتكەن مادەني ءىس-شارانىڭ جوعارى دەڭگەيدە ۇيىمداستىرىلعانى تۋرالى جىلى ەستەلىك قالدىردى.