بۇگىن الماتى جىلداردىڭ ەڭ كوپ كۇتكەن مۋزىكالىق وقيعالارىنىڭ ءبىرى – دجەننيفەر لوپەستىڭ Up All Night اتتى الەمدىك تۋرى اياسىنداعى جەكە كونسەرتى ءۇشىن مىڭداعان شاقىرىم جول ءجۇرىپ كەلگەن قوناقتاردى قارسى الىپ وتىر. كوپشىلىگى ءۇشىن بۇل – قازاقستانعا العاش كەلۋى، ال وسىندا كەلگەن سوڭ ولار تەك كوپتەن كۇتكەن شوۋدى ەمەس، عاشىق بولماي كەتپەيتىن قالانى دا اتاپ ءوتتى.
شەتەلدىك جانە وزگە قالالاردان كەلگەن كورەرمەندەر الماتىعا ءتانتى بولعانىن ايتادى. كەرەمەت تابيعات كورىنىستەرى مەن تاۋ، قوناقجاي ءارى مەيىرىمدى ادامدار، باي اسحاناسى، تازا اۋا جانە قالانىڭ ەرەكشە اتموسفەراسى – ولار ءۇشىن ناعىز جاڭالىق بولدى.
«ءبىز ارنايى دجەننيفەر لوپەستىڭ كونسەرتى ءۇشىن الماتىعا ۇشىپ كەلدىك. ونىڭ شىعارماشىلىعىن قاتتى جاقسى كورەمىز جانە ونى كورۋدى ۇزاق ارماندادىق. بۇل كەش بىزگە تەڭدەسسىز ەموسيالار سىيلايدى دەپ ۇمىتتەنەمىز»، - نوۆوكۋزنەسك (رەسەي) قالاسىنان كەلگەن ءارتوم چيجيك.
قىتايدا تۇراتىن كريستينا ساگايداك پەن اناستاسيا تۋردىاكىن دا ويىن ءبولىستى.
«مەن تايلاندتا دەمالىپ جاتقاندا، تىكەلەي سول جەردەن الماتىعا دجەننيفەر لوپەستىڭ كونسەرتىنە بيلەت ساتىپ الدىم. مۇنداي مۇمكىندىكتى جىبەرۋگە بولمايدى دەپ شەشتىم»، — دەيدى كريستينا.
«ءبىز اپكەم ەكەۋمىز بيلەتتەردى كوكتەمدە-اق VPN ارقىلى الدىق. بۇعان دەيىن سينگاپۋر مەن گونكونگتا الەمدىك جۇلدىزداردىڭ كونسەرتتەرىندە بولدىق جانە الماتىدا دا سونداي جارقىن بولادى دەپ ۇمىتتەنەمىز. ۇيىمداستىرۋ دا جوعارى دەڭگەيدە بولسا دەيمىز»، — دەپ تولىقتىردى اناستاسيا.
«مەن بۇل قالاعا العاش رەت كەلىپ وتىرمىن جانە شىن مانىندە، تەك كونسەرتكە كەلگەنمىن. ءبىراق تاعى كەلگىم كەلەتىنىن ءتۇسىنىپ وتىرمىن. مۇندا تابيعاتتان باستاپ، ساۋلەت، ادامدار مەن تاعامعا دەيىن ءبارى عاجاپ»، — دەيدى تاعى ءبىر كورەرمەن.
بۇگىنگى كەش ولار ءۇشىن الەمدىك سۋپەرجۇلدىزبەن كەزدەسۋ عانا ەمەس، سونىمەن قاتار الماتىنى جاڭا قىرىنان اشۋعا مۇمكىندىك بولماق.