«اللا – شىعىستان شىققان Dior-دىڭ مارجانى»
ازيالىق كەلبەتىمەن الەمدى مويىنداتقان اللا يلچۋن تۋرالى فيلم الماتىدا تانىستىرىلدى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
اللا يلچۋن تۋرالى دەرەكتى فيلم – جازۋشى، ديپلومات بەرلين يريشيەۆ ەڭبەگىنىڭ جەمىسى. ول وتكەن عاسىردىڭ ورتاسىنداعى ءسان الەمىنىڭ جۇلدىزىن زەرتتەپ، قانى قازاق ەكەنىن دالەلدەدى. كريستيان ديوردىڭ مۋزاسى تۋرالى 4 كىتاپ جازدى. تاريحي دەرەكتەر مەن 7 مەملەكەتتىڭ مۇراعاتىنداعى تاسپالانعان بەينەلەردى جيناقتاپ دەرەكتى فيلم ءتۇسىردى.
«دۇنيەجۇزىلىك ماركامەن بايلانىستى بولعان تاريحتى وزگەرتۋ وتە قيىن. ول ءۇشىن وتە كوپ ەڭبەك جاساۋ كەرەك. سوندىقتان ءبىز ءفيلمدى ۇستاپ تۇردىق. فرانسيانىڭ كوزقاراسىن ءبىلىپ، ديوردىڭ ءوزى ءبىزدى قولداپ، سوسىن مىنا قىتايدان شىققان كىتاپ بويىنشا ءبىزدىڭ ءفيلمنىڭ ءبارى راستالدى»، - دەيدى فيلم پروديۋسەرى ءارى رەجيسسەرى بەرلين يريشيەۆ.
بەرلين يريشيەۆتىڭ ايتۋىنشا، اللانىڭ جالعىز ۇرپاعى مارك پاريجدە تۇرادى، بۇرىن اسكەري بولعان، ءقازىر فوتوگراف بولىپ جۇمىس ىستەيدى. فيلمدە سونداي-اق اللامەن ارالاسقان، بىرگە قىزمەت ەتكەن دوستارى، ارىپتەستەرى، فرانسۋز جانە رەسەيلىك تانىمال ونەرتانۋشىلار بوي كورسەتەدى.
«وتكەن عاسىردىڭ ورتاسىنا دەيىن تەك قانا ەۋروپالىق مودەلدەر عانا ءسان كورسەتەتىن. قازاقتان شىققان اللا يلچۋننىڭ ارقاسىندا جوعارى ءسان الەمىندە ازيالىقتار پايدا بولدى. ونىڭ قازاق قىزى بولعانى ءبىز ءۇشىن مارتەبە. ال بەرلين يريشيەۆتىڭ ەڭبەگىنىڭ ارقاسىندا ەلىمىزدىڭ اتى الەمگە جاڭا قىرىنان تانىلدى»، - دەيدى ءفيلمنىڭ دەمەۋشىسى جاننا كان.
اۆتوردىڭ ايتۋىنشا، فيلم ءۇش بولىمنەن تۇرادى. ءبىرىنشى بولىمدە ءارتۇرلى مەملەكەتتەردەن جيناعان قۇجاتتار قامتىلدى. ەكىنشى بولىمدە ءسان ۇيلەرى ۇسىنعان كادرلار، فوتولار مەن اللا كيگەن كيىمدەر ۇسىنىلعان. ءۇشىنشى ءبولىم بۇرىن اللا تۋرالى بەيمالىم بولعان اقپاراتتاردى قامتيدى.