87 جاستاعى ماڭعىستاۋلىق اجەي ديماش قۇدايبەرگەن ەرەكشە سىي جاسادى، دەپ حابارلايدى aqshamnews.kz
ماڭعىستاۋدىڭ 87 جاستاعى قولونەر شەبەرى شارحات تولەمىسوۆا ديماش قۇدايبەرگەنگە ارناپ جاساعان شاشاعىن تابىستاۋ ءۇشىن «اقتاۋ – تۇركى الەمىنىڭ مادەني استاناسى» مەرەكەلىك شاراسىنىڭ اشىلۋ سالتاناتىنا ارنايى كەلىپ، 2 كۇن بويى قاتىستى. 90 جاسقا تاياعان كەيۋانانىڭ ديماشقا ارناپ شاشاق جاساپ، ونى ءوز قولىمەن تابىستاعان.
"ءبىز - قازاقپىز. قازاقتىڭ كىشكەنتاي قىزى بولىپ وستىك، ءقازىر انا بولدىق، اۋىلدىڭ داناسىمىز. ديماش – ءوزىمىزدىڭ بالامىز. اقتاۋعا كەلەدى دەگەندى ەستىگەن سوڭ، “نەگە ءبىر تال شاشاق بايلاماسقا؟” دەپ ويلادىم. سوندىقتان كەزدەسىپ، دومبىراسىنا ءوز قولىممەن تاعۋدى ءجون سانادىم"، دەدى قارت انا.
ديماش قۇدايبەرگەن اق تىلەۋلى انامەن ارنايى كەزدەسىپ، وزىنە ارناعان شاشاقتى الدى.
"الەۋمەتتىك جەلىدەن اجەمىزدىڭ ماعان ارنايى شاشاق جاساعانىن وقىپ ءبىلدىم. كەشە كونسەرتتەن سوڭ اجەمىزبەن كەزدەسە الماعانىم ويىمنان كەتپەدى. بۇگىن اعالارىما ايتىپ، ارنايى كەزدەسىپ وتىرعان جايىم بار"، دەگەن ديماش اجەنىڭ قاسىنا ەرىپ كەلگەن 10 جاسار شوبەرەسىنە القاسى مەن جۇزىگىن سىيعا تارتتى.