جۇرگىزۋشىلەر ديماشقا تۇرىك ۇلتتىق اسپابى باگلامانى سىيعا تارتتى.
تۇركيادا ديماش «Golden» اتتى تيتۋلدىق ءانىنىڭ اۋەنىمەن ساحناعا شىقتى. نەگىزگى باعدارلاما باستالماس بۇرىن ءانشى كوڭىل ايتىپ، تۇركياداعى جەر سىلكىنىسىنەن قازا تاپقاندار ءۇشىن ءبىر مينۋت ۇنسىزدىك جاريالادى، دەپ حابارلايدى اlmaty-akshamy.kz.
ديماشتىڭ جەكە كونسەرتى Antalya Expo Kongre Merkezi-دە ءوتتى.
شوۋعا الەمنىڭ 44 ەلىنەن كورەرمەندەر كەلدى. كورەرمەندەر ءارتىستىڭ انا قازاق تىلىندە ورىنداعان كومپوزيسيالارىن تىڭداپ قانا قويماي، اعىلشىن، يسپان، يتاليان، ورىس، فرانسۋز، جۇڭگو جانە جاپون تىلدەرىندەگى اندەردەن دە ءلاززات الدى. سونداي-اق، كونسەرت كورەرمەندەرىن ديماش پەن ارنايى شاقىرىلعان قوناق، قابىلداۋشى ەلدىڭ وكىلى، بۋراك يەتەر ەسىمدى مۋزىكانت ۇلكەن توسىن سىي كۇتىپ تۇردى.
كونسەرت وتە جىلى اتموسفەرادا ءوتتى. ءارتىس قازاقشا، اعىلشىنشا سالەمدەسۋ سوزىنەن باستاپ قانا قويماي، تۇرىك تىلىندە سالەمدەسىپ كورەرمەندەردىڭ كوڭىلىنەن شىقتى جانە كەش بارىسىندا قولتاڭبا قالدىرۋمەن جالعاسىن تاپتى.
بۇل كەشتە تالعامى بيىك حالىقارالىق تىڭداۋشىلاردىڭ نازارىنا اعىلشىن تىلىندەگى «If I never breathe again»، «Fly Away»، «Screaming»، «Give me your love» شىعارمالارى، قوبىزدىڭ تەرەڭ ۇنىمەن سۇيەمەلدەنەتىن تيتۋلدىق ءان «Stranger»، «Together» – ءابىلمانسۇر قۇدايبەرگەننىڭ اۆتورلىق شىعارماسى جانە ۇلتتار مەن ۇلىستار بىرلىگىنىڭ ماڭىزدى حابارىن جەتكىزەتىن ديماشتىڭ «The story of one sky» اۆتورلىق اندەرى ۇسىنىلدى.
ءار ەلدەگى جەكە كونسەرتتەرىندە ديماش باعدارلاماعا قابىلداۋشى ەلدىڭ تىلىندە شىعارمالاردى ەنگىزۋگە تىرىسادى. تۇرىك جانكۇيەرلەرى ءۇشىن تۇرىكتىڭ ايگىلى «Gesi Baglar» ءانىن ورىندادى. جۇرگىزۋشىلەر ديماشقا تۇرىك ۇلتتىق اسپابى باگلامانى سىيعا تارتتى. ديماش جىلى قارسى العانى ءۇشىن تۇرىك جەرىنە العىسىن ءبىلدىرىپ، قازاق پەن تۇرىك مادەنيەتىنىڭ ورتاقتىعىن اتاپ ءوتتى.