قازاقستاندا «Voice Beyond Horizon» دەپ اتالاتىن اۋقىمدى تەلەجوبانىڭ ءتۇسىرىلىمى باستالادى، دەپ حابارلايدى aqshamnews.kz
مۋزىكالىق شوۋدى ديماش قۇدايبەرگەن جانە الەمدەگى ءىرى مەدياحولدينگتەردىڭ بىرىنە اينالعان قىتايدىڭ Hunan TV تەلەارناسى بىرلەسە جۇزەگە اسىرادى.
جوبا ءارتۇرلى ەلدەردەن كەلگەن ورىنداۋشىلاردى بىرىكتىرەدى. ونىڭ ىشىندە جۇڭگو، قىرعىزستان، يتاليا، تۇركيا جانە سەربيا وكىلدەرى بار. ولار ديماشپەن بىرگە قازاقستاننىڭ كوركەم وڭىرلەرىنە شىعارماشىلىق ساپارعا اتتانادى.
ءتۇسىرىلىم استانا مەن الماتى قالالارىندا، الماتى، اقمولا، تۇركىستان جانە ماڭعىستاۋ وبلىستارىندا وتەدى. رەاليتي-شوۋدىڭ اقتىق كەزەڭى ەلوردادا ۇيىمداستىرىلادى.
قاتىسۋشىلار پويىزبەن جولعا شىعىپ، ەلدىڭ تابيعي جانە تاريحي نىساندارىندا توقتايدى. نەگىزگى ايالدامالار قاتارىندا كوبەيتۇز كولى، شارىن مەن بوزجىرا شاتقالدارى، سايرام-وگەم ۇلتتىق پاركى بار.
مۋزىكانتتار ونەر كورسەتەدى، شەبەرلىك ساعاتتارىن وتكىزىپ، بىرلەسكەن پەرفومانستاردا شەبەرلىكتەرىن پاش ەتەدى. جەكە جانە دۋەت تۇرىندەگى ورىنداۋلاردى حالىقارالىق دەڭگەيدەگى كاسىبي قازىلار باعالايدى.
باعدارلاما Hunan TV تەلەارناسى مەن Mango TV سيفرلىق پلاتفورماسىندا كورسەتىلەدى. ولاردىڭ جۇڭگو مەن وزگە ەلدەردەگى اۋديتورياسى 1 ميللياردتان استام كورەرمەندى قامتيدى.
«Voice Beyond Horizon» جوباسى قازاقستاننىڭ مادەني مۇراسى مەن تۋريستىك الەۋەتىن الەمدىك ارەنادا ىلگەرىلەتۋدە ماڭىزدى باستاماعا اينالماق.